पोखरा, असार १८ । केहीदिनदेखि परेको अविरल बर्षाका कारण गएराति देशका विभिन्न ठाउँमा गएको पहिरोमा परी ९ जनाको मृत्यु भएको छ । कास्की जिल्लाको देउराली गाविस वडा नम्बर ८ को ठूलो पँधेरो भन्ने ठाउँमा पहिरोले एउटा घर पुरिंदा ३ जनाको मृत्यु भएको छ ।

मृत्यु हुनेमा ८० वर्षकी मंगली गुरुङ्ग, २५ वर्षी सोनी गुरुङ्ग र डेढ वर्षकी पूर्णिमा गुरुड रहेको प्रहरीले जनाएको छ ।

पहिरो आएको बेला घरका सीमबहादुर गुरुङ्ग र उनकी श्रीमती घर बाहिर रहेकाले उनीहरु सकुशल रहेको प्रहरीले बताए । आज बिहान ३ बजेतिर परेको भीषण पानीसँगै घर माथिबाट रुख सहित पहिरो बगेर आएको थियो ।

त्यसैगरी तनहुँको थपे्र गाविस वडा नम्बर ५ मा एक घर पहिरोले बगाउँदा ३ जनाको मृत्यु भएको छ ।

स्थानीय कृष्ण बहादुर भुजेलको घर पहिरोमा पर्दा उहाँसहित श्रीमती ३६ वर्षकी भगवती भुजेल र ११ वर्षकी छोरी सीमा भुजेलको मृत्यु भएको हो ।

विहान २ बजेतिर गएको पहिरोले केही चौपायाहरु पनि बगाएको छ ।

यस्तै मुगुको सेरा गाविसमा पहिरोले पुरिएर हिजो बेलुका ३ बालकको मृत्यु भएको छ । मृत्यु हुनेमा सेरा गाविसका रामबहादुर बुढा, नरबहादुर बुढा र रत्न बुढा रहेका छन् ।

यस्तै रौतहटको शितलपुर बैरगनिया गाविस वडा नम्बर ५ मा रहेको अरुवा नदीको बाढीले १४ घर डुबानमा परेका छन् ।

गएराती परेको अविरल वषर्ापछि नदीमा आएको बाढी बस्तीमा पसेपछि जयकरण साह, थगा बैठा, जोशीराय यादव लगायत १४ घर परिवार बिस्थापित भएका हुन् ।

उनीहरु अहिले अन्यत्र गई बसेको स्थानीय शम्भु दासको भनाइ उधृत गर्दै हाम्रा रौतहट सहकर्मी रत्न अधिकारीले जनाएका छन् ।

लगातारको बषर्ात पछि दोलखाका प्राय सवै ग्रामिण सडकहरुमा यातायात सेवा पनि अवरुद्ध भएको छ ।

वषर्ाका कारण सडक हिलो हुन थालेपछि यातायातका साधन फस्न थाले पछि हिजोदेखि दोलखा सिंगटी सडकमा यातायात सेवा ठप्प भएको छ ।

दोलखा सिंगटी सडकमा नियमित यातायात सेवा संचालन गर्दै आएको अरनिको र रोल्वालिङ यातायातले सडकको अवस्था बिग्रिएको कारण जनाउदै हिजोदेखि नैं यात्रु वाहक बस संचालनमा नगरेका हुन् ।

सडक अवरुद्ध भए पछि दोलखाका उत्तरी क्षेत्रमा पर्ने २२ गाविसका जनताहरु यातायात सेवावाट वञ्चित भएका छन् भने खाद्यान्न र दैनिक उपभोग्य सामान ढुवानीमा समेत समस्या उत्पन्न भएको छ ।

यसैगरी बर्षाका कारण फस्कु, क्षेत्रपा, मिर्गे, गैरीमुदी-जोरमाने सडकमा पनि यातायात सेवा अवरुद्ध भएको छ ।

त्यस्तै भिरकोट, झुले र जुँगुको पनि यातायात अवरुद्ध हुने सम्भावना बढेको यातायात व्यवसायीको भनाइ उधृत गर्दै हाम्रा दोलखा सहकर्मी लक्ष्मण खड्काले जनाएका छन् ।