काठमाडौं, असार १८ । एकीकृत नेकपा माओवादीले नेकपा एमाले र नेपाली कांग्रेससंग छुट्टाछुट्टै छलफल गरेको छ । सिंहदरबारमा भएको छलफलमा सदनको गतिरोध अन्त गर्ने उपायबारे छलफल भएको माओवादी वरिष्ठ नेता डा.बाबुराम भट्टर्राईले बताए ।

भट्टर्राईले सदन सुरुचारु गर्नेबारे सहमतिको सम्भावना बढेको बताए । आफूहरुले उठाएको मागबारे एमाले सकारात्मक देखिएको उनको भनाई थियो ।

एमाले सचिवसमेत रहेका सूचना तथा संचारमन्त्री शंकर पोखरेलले भोलिसम्ममा कुरा मिल्ने बताए । उनले भने, सहमतिको नजिक पुगिएको छ ।

छलफलमा माओवादी अध्यक्ष प्रचण्ड, वरिष्ठ नेता डा.बाबुराम भट्टर्राईलगायत सहभागी थिए । एमालेबाट प्रधानमन्त्री माधवकुमार नेपाल, सचिव समेत रहेका संचारमन्त्री शंकर पोखरेललगायत सहभागी थिए ।

एमालेसंग छलफलपछि माओवादीले कांग्रेससंग छलफल गरिरहेको छ । छलफलमा नागरिक सर्वोच्चताका लागि प्रधानमन्त्रीबाट आउनुपर्ने सम्बोधनबारे छलफल भइरहेको बुझिएको छ ।