काठमाडौ,२३ माघ । सेना समायोजन र पुर्नस्थानाका लागि बनाएको कार्ययोजना बारे छलफल गर्न सेना समायोजन विषेश समितिको बैठक आज बस्दैछ । दिउँसो प्रधानमन्त्री तथा मन्त्रिपरिषदको कार्यालय िसंहदरबारमा बस्ने बैठकमा माओवादी लडाकुको चेन अफ कमाण्डका विषयमा छलफल हुनेछ । माओवादीको निगरानीका लागि बनाइने ९ सदस्यीय सचिवालयको नेतृत्व कसले गर्ने भन्ने विषयमा कुरा मिल्न सकेको छैन । चेन अफ कमान्डको सचिवालय संयोजकका एकीकृत माओवादीले कमान्डर नन्दकिशोर पुनको नाम प्रस्ताव गरेको छ भने अरु दलहरुले स्वतन्त्र व्यक्ति हुनुपर्ने प्रस्ताव गरेको समितिका सदस्य फोरमका सह-अध्यक्ष जय प्रकाश प्रसाद गुप्ताले जानकारी दिनुभयो ।

माओवादी लडाकु नेपाली सेना नेपाल प्रहरी सशस्त्र प्रहरीबाट एक—एक जना प्रतिनिधि तथा समायोजन सम्बन्धी चारजना विज्ञलाई सचिवालयमा समावेश गर्न सहमति भने भइसकेको छ । आजको बैठकमा समितिमा नै छलफल गरेर मिलाउने र उच्चस्तरीय राजनीततिक संयन्त्रमा छलफलका लागि पठाउने विषयमा पनि छलफल हुने गुप्ताले बताउनुभयो । सेना समायोजन नयाँ संविधान अघि या पछि समायोजनको संख्या र क्षेत्रका बारेमा संयन्त्रले टुङ्गो लगाउने प्रारम्भिक सहमति भइसकेको छ ।