काठमाडौं माघ २४ । एकीकृत माओवादीका प्रवक्ता दीनानाथ शर्माले वर्तमान सरकार नढली शान्ति र संविधान असम्भव भएको बताएका छन् । आइतबार रिपोर्टर्स क्लब नेपालको साक्षात्कार कार्यक्रममा प्रवक्ता शर्माले उच्चस्तरीय राजनीतिक संयन्त्रको बैठकमा माओवादीले सरकार परिवर्तनको निर्णय गराउने दाबी गरे ।
नेता शर्माले माओवादीले आफ्नै नेतृत्वमा संयुक्त राष्ट्रिय सरकार बनाउन चाहेको स्पष्ट पारे ।  संविधानसभाको म्याद एक वर्ष थप्न सकिने उनको भनाइ थियो । त्यसका लागि संविधान संशोधन गर्न पछि नपरिने बताए । 
संविधान नबनाउँदै सेना समायोजन भन्नु प्रगतिगामी सोच र २०४७ को संविधान ब्युँताउने षड्यन्त्र भएको उनको भनाइ थियो । 'संविधान बन्नुअघि सेना समायोजन हुनै सक्दैन' उनले भने ।
रिपोर्टर्स क्लब नेपालका अध्यक्ष ऋषि धमलाको सभापतित्वमा सम्पन्न साक्षात्कार कार्यक्रममा नेकपा एमालेका सचिव युवराज ज्ञवालीले २०६७ जेठ १४ सम्म वर्तमान सरकारको विकल्प नभएको दाबी गरे । उनले भने- माओवादी अध्यक्षले नौ महिनादेखि यो  सरकार ढाल्ने बताइरहेका छन् । तर १४ जेठसम्म यो सरकारलाई कसैले हल्लाउन सक्दैन । ज्ञवालीले संविधान जारी हुनुअघि नै माओवादी लडाकु समायोजन गरिनुपर्ने दोहोर्याए ।
कार्यक्रममा नेपाली कांग्रेसका सभासद् गगन थापाले अब कांग्रेसकै नेतृत्वमा राष्ट्रिय सरकार बनाउनु सबैभन्दा उत्तम विकल्प भएको बताए । 'यो सरकारले केही गर्न सकेन' उनले भने- मन्त्रीहरु अनुशासनहीन र अराजक छन् । त्यसैले अब निश्चित कार्ययोजना बनाएर कांग्रेसकै नेतृत्वमा राष्ट्रिय सरकार सबैभन्दा उत्तम विकल्प हो । थापाले संविधानसभाको म्याद नथपी शान्ति र संविधान बन्न नसक्ने बताए । 'वास्तविकताको धरातलमा उभिएर सोच्दा म्याद थप्नुको विकल्प छैन' उनले भने । उच्चस्तरीय राजनीतिक संयन्त्र समयको आवश्यकता र परिस्थितिको बाध्यता भएको उनको भनाइ थियो ।