काठमाडौं, माघ २५ - प्रधानमन्त्री माधवकुमार नेपालले जमिम शाहको हत्यारालाई  चाँडो पत्ता लगाएर कडा कारबाही गर्ने बताएका छन् ।  हत्या गरिएका सञ्चार उद्यमी शाहको पानीपोखरीस्थित निवासमा सोमबार पुगेर  उनको परिवारसँग कुरा गर्दै प्रधानमन्त्री नेपालले दोषीलाई कडा कारबाही गर्ने बताएका हुन् ।  शाहका बुबाले प्रहरी प्रशासनको कमजोरीको कारण आफ्नो छोराको हत्या भएको गुनासो प्रधानमन्त्रीसँग गरेका थिए ।

२४ घण्टा वितिसक्दा पनि हत्यारा पत्ता नलाग्दा हत्यारालाई कारबाही हुन्छ भन्ने आशा नभएको उनले  प्रधानमन्त्रीसँग भने । शाहका बाबुले आफ्नो छोराको जस्तो मृत्यु कसैको छोराको नहोस भनि प्रधानमन्त्रीसँग दुःख व्यक्त गरेका थिए । प्रधानमन्त्रीको साथमा बनमन्त्री दीपक बोहरा र गृहराज्यमन्त्री रिजवान अन्सारी पनि शाह निवास गएका थिए । सिंहदरवारमा सुरक्षा अधिकारीलाई निर्देशन दिएलगत्तै प्रधानमन्त्री पानीपोखरीस्थित शाह निवासमा गएका थिए । शाहको शव पोस्मार्टमपछि उनकै निवासमा राखिएको छ ।

यसअघि प्रधानमन्त्री नेपालले सञ्चार उद्यमी शाहको हत्याबारेमा सुरक्षा अधिकारीहरुबाट जानकारी लिएका थिए । उनले तत्काल अपराधीहरुलाई पक्राउ गर्न निर्देशन दिएका प्रधानमन्त्रीका सहयोगी सुरोजङ पाण्डेले बताए ।

बैठकमा गृहराज्यमन्त्री रिजवान अन्सारी, गृहसचिव गोविन्द कुसुम, नेपाल प्रहरी, सशस्त्र र अनुसन्धान विभागका निमित्त प्रमुखलगायत उपत्यकाका विभिन्न प्रहरी ईकाईका अधिकारीहरुको उपस्थिति थियो । गृहमन्त्री भीम रावलसहित तीनवटै सुरक्षा निकायका प्रमुखहरु भने अहिले चीन भ्रमणमा छन् ।

च्यानल नेपाल तथा स्पेशटाइम नेटवर्कका अध्यक्ष शाहको आइतबार दिउँसो लाजिम्पाटमा गोली हानी हत्या गरिएको थियो । गोली लागेर शाहका सवारी चालक मधुकरमान मालाकार घाइतेसमेत घाइते भएका थिए । उनको शिक्षण अस्पतालमा उपचार भइरहेको छ ।