काठमाडौ १६ फागुन । पोखरा रामेछाप र सुनसरीमा माटोको ढिस्कोले पुरिएर आईतवार पाँच महिलाको मृत्यु भएको छ । अन्य ९ जना घाइते भएका छन् । कास्कीको पुरन्चौर गाविस ५ चुरुङ्गास्थित धारा प्रावीको हाताभित्र माटो खन्ने क्रममा ३ जनाको मृत्यु भएको छ । मृत्यु हुनेहरुमा पुरन्चौर ८ का गोमा अधिकारी र गीता विक तथा वडा नं ६ की मनमाया नेपाली रहेका छन् । मृतक मध्ये अधिकारी र विकको घटनास्थलमै र नेपालीको उपचारको क्रममा पश्चिमान्चल क्षेत्रीय अस्पतालमा मृत्यु भएको हो । ढिस्कोले पुरिँदा पुरन्चौर गाविसकी शान्ति पौडेल शोभा विक बुद्धिसरा विक मीना विक अनिता विक सीता पौडेल रमा बास्तोला शोभाकुमारी विकलगायत घाइते भएका छन् । घाइतेहरुको पश्चिमान्चल क्षेत्रीय अस्पताल पोखरामा उपचार भइरहेको प्रहरीले जनाएको छ । यस्तै रामेछापको बेताली ५ की रत्नकुमारी बस्नेतको पनि माटोको ढिस्कोले पुरिएर आजै मृत्यु भएको छ । उता सुनसरीको बराहक्षेत्रमा माटो खन्ने क्रममा माथिबाट खसेको ढिस्कोले पुरिएर स्थानिय सीता रम्तेलको मृत्यु भएको प्रहरीले जनाएको छ । घाईते बराहक्षेत्र ३ की ४८ बर्षिया अनिता राईको विपि कोईराला स्वास्थ्य विज्ञान प्रतिष्ठान धरानमा उपचार भईरहेको छ ।