काठमाडौ२४ फागुन । प्रधानमन्त्री माधवकुमार नेपालले एकीकृत नेकपा माओवादीले समायोजनकालागि सहयोग गरे जेठ १४ मा संविधान जारी गर्न कुनै अप्ठेरो नहुने पनि बताउनुभएको छ । सरकारी भत्ता लिने शिविरका लडाकुलाई अहिले पनि माओवादीले नीजि सेनाको रुपमा लिने गरेकाले शान्तिप्रकि्रयामा असर परिरहेको बताउनुभयो । प्रधानमन्त्री नेपालले अहिले पनि माओवादी नेतृत्वले शिविर भित्र गएर लडाकुहरुलाई पार्टीगत प्रशिक्षण दिने गरेको भन्दै आपत्ति जनाउनुभयो । अन्तर्राष्टिय श्रमिक महिला दिवसको अवसर पारेर टे्रड युनियन महासंघ जिफन्ट ले आजदेखि राजधानीमा गरेको श्रमिक महिलाहरुको राष्ट्रिय सम्मेलनको उद्घाटन गदै प्रधानमन्त्री नेपालले महिला आन्दोलनका लागि महिलाहरु एकबद्ध हुनुपर्ने र महिला आन्दोलनमा पुरुषको पनि सहभागिता रहनुपर्ने बताउनुभयो । विशेष गरी असंगठित क्षेत्रका श्रमिक महिलाहरु अहिले पनि अधिकार पाउनबाट विाचत रहेको भन्दै त्यसका लागि सरकारले गर्नुपर्ने काम गर्ने बताउनुभयो । कार्यक्रममा रक्षामन्त्री विद्या भण्डारीले महिला भएकै कारण विभेद हुने धेरै ठाउँ अझै भएकाले त्यसतर्फ महिलाहरुले एकत्रित आवाज उठाउनुपर्ने बताउनुभयो । यसैविच संविधानसभाका अध्यक्ष सुवासचन्द्र नेम्वाङले संविधानसभामा पेस भएका एघार वटै विषयगत समितिका प्रतिवेदनलाई निर्धारित समयभित्र सहमतिमा ल्याउन सकिने विश्वास व्यक्त गर्नुभएको छ । प्रेस चौतारी कास्कीले पोखरा विमानस्थलमा गरेको पत्रकार सम्मेलनमा नौ वटा समितिमा दलहरुबीच गम्भीर मतभेद भएपनि निर्धारित समयभित्र सहमति जुटाउन सकिने उहाँको भनाइ थियो । संवैधानिक समितिको समय सीमा समाप्त भइसकेकोले भोलि हुने संविधानसभाको बैठकमा कार्यतालिका संशोधन गरी म्याद थप गरिने उहाँले जानकारी दिनुभयो । दलहरुलाई अबको बाँकी समय पूरै संविधान निर्माणमा लाग्न उहाँको आग्रह थियो । यदि निर्धारित समयभित्र नै सबै विषयहरुमा सहमति जुटाउन नसके केही प्रावधान बाँकी राखेर पनि संविधान जारी गरिने नेम्बाङको खुलासा थियो । संविधान जारी भएपछि बाँकी प्रावधानहरुलाई दलहरुबीचको सहमति कायम गर्दै संशोधन गर्दै लान सकिने उहाँको तर्क थियो । नेम्बाङले दलहरुले भन्दै आएको सेना समायोजनको विषय संविधान निर्माणको लागि विवादको विषय नभएको स्पष्ट पार्नुभयो । सेना समायोजन अन्तरिम संविधानमा कतै पनि उल्लेख नभएको उहाँको जिकिर थियो ।