काठमाडौ २५ फागुन । उपप्रधान एवम् भौतिक योजना तथा निर्माण मन्त्री विजयकुमार गच्छदारले सत्ता कब्जा होइन मुलुकको अहिलेको आवश्यकता संविधान निर्माण भएको बताउनु भएको छ । पाँच दिने भारत भ्रमणमा आज त्यतातर्फ प्रस्थान गर्नु भएका उपप्रधानमन्त्री गच्छदारले मुलुककालागी जनविद्रोहको अहिले आवश्यकता नरहेको जिकिर गर्दै कसको विरुद्ध आन्दोलन गर्ने भनी प्रश्न गर्नु भयो । जनताको बलिदानीबाट प्राप्त लोकतन्त्रलाई संस्थागत गर्न र संविधान निर्माण गर्नतर्फ लाग्न उहाँले दलहरुसँग आग्रह गर्नु भयो । अहिले सरकार परिवर्तनको बेला नभएको दावी गर्दै उहाले सरकार परिवर्तन भएर मुलुकको गतिरोध अन्त्य नहुने बताउनु भयो । आफ्नो भारत भ्रमणलाई निजी भन्दै उहाँले भ्रमणको क्रममा भारतीय उच्च नेताहरुसँग भेटवार्ता हुने जानकारी दिनु भयो । उहाँ आगामी शनिवार स्वदेश फर्कने कार्यक्रम रहेको छ ।