रिपोर्टर्स क्लब नेपालका सचिव बैकुण्ठ ढुंगानाको सभापतित्वमा सम्पन्न साक्षात्कार कार्यक्रममा एकीकृत माओवादीका पोलिटब्युरो सदस्य अग्नि सापकोटाले सरकारले अनमिनलाई लखेट्ने आधार तयार पार्न सरकारले गलत प्रचार गराएको आरोप लगाए । 'हामी युद्ध छल्न चाहन्छौं,' उनले भने- युद्ध पिपासुहरु हामीलाई युद्धमा होम्न चाहन्छन् । माओवादी विरोधीहरुले २०४७ कै संविधान ब्युँताउन षड्यन्त्र गरिरहेको उनको आरोप थियो ।

कार्यक्रममा एमाले पोलिटब्युरो सदस्य प्रकाश ज्वालाले माओवादी लडाकुको वास्तविक तथ्यांक नदिएकाले अनमिन विवादमा परेको बताए । 'अनमिन नेपालको शान्ति प्रक्रियामा सहजकर्ताका रुपमा आएको हो,' उनले भने-तर, अहिले उसको भूमिकामा शंका उत्पन्न भएको छ । प्रधानमन्त्री माधवकुमार नेपाल शान्ति र संविधानका लागि बाधक नबन्ने उनको भनाइ थियो ।

कार्यक्रममा सद्भावना पार्टीका महासचिव अनिलकुमार झाले अनमिनले माओवादीको पक्ष लिएको बताए । सरकारले तोकेको मितिबाहिर अनमिन रहन नसक्ने उनको भनाइ थियो । 'तीन दलसँग ७५ प्रतिशत जनमत छ,' उनले भने- मधेसवादी दलले त उनीहरुलाई संविधान बनाउन सहयोग गर्ने मात्र हो ।