ASSOCIATION WITH RADIANT INFOTECH NEPAL
ऋषि धमला : नयाँ दिल्लीं, फागुन २७ । भारतीय अर्थमन्त्री प्रणव मुखर्जीले दलहरुबीच सहमति गरेर १४ जेठमै संविधान जारी गर्नुपर्ने बताएका छन् । बिहीबार नयाँ दिल्लीमा उपप्रधानमन्त्री विजयकुमार गच्छदारसँगको एक घन्टे कुराकानीमा मुखर्जीले भने, 'अझै पनि समय गुज्रेको छैन, दलहरुबीच एकता भए संविधान जारी गर्न सकिन्छ । बरु भारत त्यसका लागि हरतरहका सहयोग गर्न चाहन्छ ।'
नेपाल हेर्ने जिम्मा समेत पाएका मुखर्जीले माओवादीको लोकतान्त्रिक रुपान्तरण जरुरी भएको र ऊ शान्ति र संविधानका लागि सहमतिमा आउनैपर्ने धारणा राखेका थिए । उनले भने- नेपालमा अहिले सहमति, सहकार्य र एकता चाहिएको छ । त्यसमा माओवादी सहमतिमा नआई सुखै छैन ।
लोकसभामा भएको भेटमा
गच्छदारसँग उनले नेपालमा भारतविरोधी गतिविधि, सुरक्षा आर्थिक अभिवृद्धिलगायत विषयमा समेत जिज्ञासा राखेको स्रोतले जनाएको छ । उपप्रधानमन्त्री गच्छदारले नेपालमा भारतविरोधी गतिविधि हुन नदिने कुरामा आश्वस्त पारेका थिए ।यसैबीच, उपप्रधानमन्त्री गच्छदारले पछिल्लो राजनीतिक घटनाक्रमबारे कंग्रेस आईका महामन्त्री दिग्विजय सिंहसँग पनि भेटवार्ता गरेका छन् । 'दुवै नेतासँग खुलेर कुराकानी भएको छ,' गच्छदारले भने- सिंहसित मधेसी जनअधिकार लोकतान्त्रिक र कंग्रेस आईको सम्बन्धका बारेमा पनि कुराकानी भयो ।
