काठमाडौ २८ फागुन । संयुक्त राष्ट्रसंघीय राजनीतिक मामिला सम्बन्धि उप महासचिव विलिन पास्कोले शान्ति र संविधान लेखनमा दलहरु गंभिर देखिए पनि प्रकृयामा अपेक्षित प्रगति नभएको बताउँनु भएको छ ।
उपमहासचिव पास्कोले नेपालको शान्ति प्रकृयाको टुङ्गो लगाउन दलहरुले जनताको चाहना अनुसार काम गर्नुपर्ने समेत बताउँनु भएको हो । चार दिने नेपाल भ्रमण सकेर स्वदेश फर्कनुअघि त्रिभुवन अन्तर्राष्ट्रिय विमानस्थलमा साचाकर्मीहरुसगँ कुराकानी गर्दै उपमहासचिव पास्कोले अनमिनले आफ्नो अधिकार क्षेत्र र म्यान्डेड अनुसार नै काम गरेको दोहोर् याउनुभयो । उहाँले अनमिनको रोहवरमा सरकार र तत्कालिन विद्रोही माओवादीले सहमति गरेकोले माओवादी लडाकुको संख्या उपलब्ध गराउने आफुहरुको म्यान्डेड नभएको स्पष्ट पार्नुभयो । पास्कोले आफुसँगको भेटमा माओवादी अध्यक्ष पुष्पकमल दाहालले अब बस्ने जेएमसीसीको बैठकमा लडाकुको संख्या उपलब्ध गराउने प्रतिवद्धता जनाउनु भएको जानकारी गराउनुभयो ।
उपमहासचिव पास्कोले सबै दलका नेताहरु शान्ति प्रकृया र संविधान लेखनमा सकारात्मक रहेपनि प्रकृया भने चुनौतिपुर्ण रहेको टिप्पणी गर्नुभयो । उहाँले दलहरुले आपसमा सहमति र जनताको चाहना अनुसार नै शान्ति प्रकृया सेना समायोजन र संविधान लेखनलाई टुङ्गोमा पुर् याउन सुझाव समेत दिनुभयो ।
यसअघि छ महिनामा सेना समायोजन गरेर शान्ति प्रकृयालाई टुङगोमा पुर् याउने भनिएपनि दलहरुबीच सहमति नहुँदा अनमिनको म्याद पटक पटक थपिएको छ । यसअघि उपमहासचिव पास्कोले प्रधानमन्त्री माधवकुमार नेपाल नेपाली काग्रेसका सभापति गिरिजाप्रसाद कोइराला एकीकृत नेकपा माओवादी अध्यक्ष पुष्पकमल दाहाल प्रचण्ड एमाले अध्यक्ष झलनाथ खनाल परराष्ट्रमन्त्री रक्षामन्त्री लगायतसँग भेट गर्नुभएको थियो । त्यसैगरी पास्कोले माओवादीको तेश्रो डिभिजन शक्तिखोरको समेत भ्रमण गर्नुभएको थियो ।