काठमाडौ १७ भदौ । सशस्त्र प्रहरी वीरगन्ज भन्सार राजश्व गस्ती टोलीले बिहीबार बिहान भारतबाट भन्सार छली नेपाल भित्रियाएको एक करोड ३७ लाख मूल्य बराबरको सुन बरामद गरी वीरगन्ज भन्सारलाई बुझाएको छ । प्रहरीले भारतबाट बा ७ च ६३४४ नम्बरको कारको सिटमुनी लुकाइछिपाई नेपाल भित्र्याउने क्रममा भन्सार अगाडिको मूल सडकबाट प्रहरीले चार किलो २ सय ९९ ग्राम सुन बरामद गरेको हो । प्रहरीले सुन भित्र्याउने वाहनको चालक वीरगन्ज उप-महानगरपालिका वडा नं १३ घडिअर्वा निवासी अरविन्द सिंह र सुनधनी वीरगन्ज आदर्शनगर वडा नं ७ निवासी अमित दारुकालाई पक्राउ गरी आवश्यक कारबाहीको लागि वीरगन्ज भन्सारमा बुझाएको सशस्त्र प्रहरी वीरगन्ज भन्सार राजश्व गस्तीका प्रमुख कृष्ण कोइरालाले जानकारी दिए । पूर्व सूचनाको आधारमा प्रहरीले बुधबार साँझ ५ः३० बजेको समयमा वाहन चालक र माल धनिलाई वाहनसहित नियन्त्रणमा लिई विहीबार बिहान भन्सार प्रमुख लावण्य ढकालको रोहवरमा वाहनलाई जाँच गर्दा सुन र सुनका विभिन्न गहना बरामद गरिएको नायब उपरीक्षक कोइरालले बताए । प्रहरीले गहनासागै २० थान सोनी कम्पनीको मेमोरीकार्डसमेत बरामद गरेको छ ।