काठमाडौ २३ भदौ । सविधानसभाका सदस्य मोहम्द इस्तीयाक राई बस्दै आएको बाँकेको जयसपुर ६ स्थित एक घरमा अज्ञात् समूहले बम बिस्फोट गराएको छ । जिल्ला प्रहरी कार्यालय बाँकेका डीएसपी विनोद घिमिरेका अनुसार सभासद्का भिनाजु मोहम्द अयुग राईको नाममा रहेको घर अगाडि सुतली बम विस्फोट गराइँदा च्यानल गेट र छेउमै राखेको एक भारतीय यूपी ७८ एजी २१२२ नम्बरको कारमा सामान्य क्षति पुगेको छ । बम विष्फोटको आवाज सुनेर छतमा सुतिरहेका छिमेकी २५ वर्षका मोहम्मद अहमद राई छतबाट खसेर घाइते भएका छन् ।
विष्फोटको अहिलेसम्म कुनै समूहले आधिकारिक रुपमा जिम्मेवारी लिएको छैन । सभासद् राई मधेसी जनअधिकार फोरम नेपालको बाँके क्षेत्र नम्बर २ बाट प्रत्यक्ष निर्वाचन प्रणालीबाट निर्वाचित हुनुभएको हो । केही दिनअघि मात्र जनतान्त्रिक तराई मधेस मुक्ति पार्टीले मधेसवादी दलहरुले मधेसका मुद्दा बिसे्रर माओवादीसँग मिलोमतो गर्न लागेकाले जनकारवाही गर्ने चेतावनी दिएको थियो ।