काठमाडौं २५ भदौं । अनमिनमा देखिएको विवाद समाधान गरि एउटै पत्र तयार गर्न आज फेरि सरकार र एकीकृत नेकपा माओवादीबीच छलफल हुँदैछ । एउटै पत्र तयार गर्ने हिजोको सहमति अनुसार आज अनमिनको कार्यदेश र म्यादथप बारे थप छलफल हुन लागेको हो । आज दिउँसो हुने छलफलबाट सरकारले राष्ट्रसंघमा पठाएको पत्र र माओवादीले छुट्टै पठाएको पत्रका आधारमा नै सहमति गरिने माओवादी नेता वर्षमान पुन अनन्तले जानकारी दिनुभयो । उहाँले सरकारले एउटै पत्र बनाउ भनकॊमा माओवादी सकारात्मक रहेको र आज साझा धारणा तयार हुनेमा विश्वास गरिएको बताउनुभयो । सरकारले अनमिनको कार्यदेशमा सेनाको पर्यवेक्षण उल्लेख नगरि चार महिना थप्न पत्र पठाएकोमा माओवादीले त्यसमा आपत्ति जनाउँदै ६ महिना म्याद थप्नुपर्ने बताएको छ ।