१० महिनामा ११ खर्ब व्यापार घाटा

काठमाडौं १२ जेठ । चालू आर्थिक वर्षको १० महिनामामात्रै करिब ११ खर्बको व्यापार घाटा भएको छ । चालू आर्थिक वर्षको वैशाख महिनासम्म १० खर्ब ९९ अर्ब रुपैयाँ व्यापार घाटा भएको भन्सार विभागले जनाएको हो ।

१० महिनासम्ममा ११ खर्ब ७८ अर्ब बराबरको वस्तु आयात भएको छ भने निर्यात जम्मा ७८ अर्ब ५३ करोडकोमात्रै भएको विभागको तथ्यांक छ ।

निर्यातको तुलनामा आयात २०.६ प्रतिशतले वृद्धि भएको विभागले जनाएको छ ।अघिल्लो वर्ष यसै अवधिमा ९ खर्ब ८२ अर्ब बराबरको वस्तु आयात भएको थियो भने ६६ अर्ब बराबरको वस्तु निर्यात भएको थियो ।

समीक्षा अवधिमा दुई खर्ब ६ अर्ब बराबरको पेट्रोलियम पदार्थ आयात भएको छ भने एक खर्ब १९ अर्ब बरारबको फलाम तथा स्टिलजन्य वस्तु आयात भएको छ ।

यस्तै, एक खर्ब ५५ अर्बको मेसिनरी तथा इलेक्ट्रिक सामान आयात भएको छ ।नेपाल कृषिप्रधान मुलुक भएपनि तरकारी, तेलहन वस्तु तथा पशुपक्षीकोमात्रै २९ अर्बको सामान भित्रिएको छ । यस अवधिमा गेडागुडी ४४ अर्ब, ग्यास २९ अर्ब ८३ करोेड, दुग्धजन्य वस्तुहरु १७ करोड बराबरको आयात भएको छ ।

यस्तै, दुई अर्बको चिनी एवं १२ अर्ब ३० करोडको तेलजन्य वस्तुहरु भित्रिएको विभागको तग्थ्यांक छ ।निर्यातको अवस्था नाजुक छ । समीक्षा अवधिमा ८ अर्ब बराबरको तरकारी, पशुपक्षी निर्यात भएको विभागले जनाएको छ । नेपालबाट ऊनीधागो ८ अर्ब ७२ करोड एवं चिया तथा कफी ६ अर्ब ३७ करोड बराबरको निर्यात भएको छ ।

भारतसँगमात्रै व्यापार घाटा ७ खर्ब ११ अर्ब पुगिसकेको छ भने चीनसँग पनि एक खर्ब ६७ करोड व्यापार घाटा भएको भन्सार विभागले जनाएको छ ।


ताजा खबर

Loading...
Loading...
Loading...
    यो पनि पढ्नुहोस्