गुठी माँस्ने शैतान जस्तै रैतान

गुठी संस्थान अन्र्तगतको मच्छिन्द्रनाथ गुठीले हालसम्म ६०१ रोपनी एक आना दुई पैसा जग्गा रैतान परिणत गरी दुई करोड ८८ लाख चार हजार दुई सय प्राप्त गरेको छ । एक दशक अघि विभिन्न समयमा रैतान गर्दा जम्मा भएको रकम बैंकमा राख्दा दोम्बर नै भएको मान्दा पनि पाँच करोड भएको मान्नुपर्छ ।

ललितपुरको महत्वपूर्ण स्थानहरुमा रहेका जग्गाको हालको मूल्य अनुसार कतिपयको एक रोपनीकै पाँच करोडभन्दा बढी पुगिसकेको छ । रैतान भएका ती जग्गामध्ये कुनैपनि रोपनीको करोड रुपैयाँ भन्दा कमले खरिद गर्न सकिदैन । वर्तमानको जग्गाको मूल्यलाई हिसाब गर्दा गुठी संस्थानले मच्छिन्द्रनाथ गुठीको छ सय रोपनी जग्गा गुमाएको मान्नुपर्छ ।

ललितपुरको महत्वपूर्ण ठाउँहरुमा रहेको मच्छिन्द्रनाथ गुठीको जग्गा विगतमा रैतान खोल्दा व्यक्तिका नाममा दर्ता भएको हो । व्यक्तिले कमाई खाएको जग्गावापत् तीरो तिरेर गुठी संचालन गर्ने पद्धति बनाइएको थियो । तर, योजनावद्ध तरिकाले गुठी माँस्ने र व्यक्तिलाई पोस्ने गर्दा मच्छिन्द्रनाथ गुठी पनि तारोमा परेको थियो ।

संकटमा पर्न सक्छ रथजात्रा

रातो मच्छिन्द्रनाथ तथा मिननाथको रथहरु निर्माणमा मात्र वार्षिक २६ लाख निर्माण खर्च हुने गर्छ । योसँग जोडिएको भोटोजात्रालगायतका पूजाहरुको खर्च अलग्गै छ । दिनानुदिन खर्च बढ्दै जाँदा गुठी संस्थानलाई धान्न कठिन हुनसक्छ । किनभने, संस्थानले देशका धेरैवटा जात्रा र पर्वहरु संचालनमा खर्च दिनुपर्ने अवस्था छ ।

गुठी संस्थान अन्र्तगतको मछिन्द्र गुठीले पूजा, नित्य पूजा, र रथयात्रा संचालन गर्दछ । रथ निर्माणका सामाग्रीहरु अभाव हुँदै जानु र आधुनिकिकरणले परम्परागत संस्कृति संकटमा पर्नुले मच्छिन्द्रनाथको पर्व र रथजात्रा समेत संकटमा पर्न सक्छ ।

गुठीको जग्गा माँसिदै जानु, गुठीको मर्मविपरित्का कदमहरु विभिन्न समयमा बनेका सरकारहरुले चाल्नुले परम्परागत संस्कृति र संस्कारमाथि प्रहार भइरहेको छ । संस्कृतिमाथिको प्रहार पहिचानमाथिको प्रहार हो भन्ने बेलैमा चेत नआए अस्तित्व नै संकटमा पर्न सक्छ ।


ताजा खबर

Loading...
Loading...
Loading...