काठमाडौं, १६ असार । ज्येष्ठ नागरिक समाज माकलबारीले शनिबार ज्येष्ठ नागरिक तथा बुहारी सम्मान सम्मान कार्यक्रम आयोजना गरेको छ । ७० वर्ष नाघेका ज्येष्ठ नागरिक र एकल ससुरा वा सासुलाई माया ममताका साथ पालनपोषण गर्ने बुहारीहरुलाई समाजले सम्मान गरेको छ ।
समाजका अध्यक्ष टेकनाथ अधिकारीका अनुसार ज्येष्ठ नागरिक तथा पारिवारिक कर्तव्य निर्वाहमा अब्बल बुहारीहरुमा उत्साह जगाउन सम्मान कार्यक्रम गरिएको हो । समाजको तर्फबाट गोकर्णेश्वर नगरपालिकाका मेयर सन्तोष चालिसेले ज्येष्ठ नागरिक तथा बुहारीहरुलाई दोसल्ला ओडाउनुका साथै सम्मानपत्र हस्तान्तरण गरेका थिए । सो अवसरमा ३० ज्येष्ठ नागरिक ८ जना बुहारी र ज्येष्ठ नागरिकलाई सहयोग गर्ने ३ व्यक्तित्वलाई सम्मान गरिएको थियो ।
सो अवसरमा मेयर चालिसेले नगरपालिकाका तर्फबाट ज्येष्ठ नागरिक समाजलाई बाद्ययन्त्र पनि हस्तान्तरण गरेका छन् । समाजले संस्कृति संरक्षणको उद्देश्यले आयोजना गर्ने भजन–कीर्तन कार्यक्रमलाई सघाउ पुगोस् भनेर नगरपालिकाले वाद्ययन्त्र उपलब्ध गराएको हो । नगरपालिकाले उपलब्ध गराएको वाद्ययन्त्रमा हार्मोनियम, तबला, मादल, खैंजडी लगायत छन् । मेयर चालिसेले समाजका अध्यक्ष अधिकारीलाई ती वाद्ययन्त्र हस्तान्तरण गरेका थिए ।
मेयर चालिसेले ज्येष्ठ नागरिक समाजका लागि कोठा पनि उपलब्ध गराउने वचन दिएका छन् । ‘नगरपालिकाले ज्येष्ठ नागरिक समाजका लागि उपयुक्त ठाउँमा कोठा उपलब्ध गराउनेछ,’ कार्यक्रममा मेयर चालिसेले भने ।
