काठमाडौं, २९ चैत। इंग्लिस प्रिमियर लिगको शीर्ष चारमा रहँदै आउँदो सिजनको च्याम्पियन्स लिगका लागि छनौट हुने आर्सनलको सपनामा गम्भीर धक्का लागेको छ ।
लिग अन्तर्गत सोमबार राति भएको खेलमा आर्सनल रेलिगेशनबाट जोगिन संघर्षरत क्रिष्टल प्यालेससँग ३–० ले पराजित भएपछि उसको च्याम्पियन्स लिग सपनामा धक्का लागेको हो । घरेलु मैदानमा भएको खेलमा क्रिष्टल प्यालेसलार्य जिताउन एन्ड्रोस टाउनसेन्ड, योहान काबायी र लुक मिलिभोजेभिकले गोल गरे ।
१७ औं मिनेटमा टाउनसेन्डले गोल गर्दै सुरुवाति अग्रता दिलाए । ६३ औं मिनेटमा काबायी र ६८ औं मिनेटमा मिलिभोजेभिकले गोल गर्दै प्यालेसलाई जित दिलाए ।
जितपछि प्यालेस रेलिगेशन जोनबाट ६ अंकमाथि पुगेको छ । १६ औं स्थानको उसको ३१ खेलबाट ३४ अंक भएको छ । हारपछि छैटौं स्थानको आर्सनलको ३० खेलबाट ५४ अंक भएको छ ।
लिगका ८ खेल बाँकी हुँदा आर्सनल चौथो स्थानको म्यानचेस्टर सिटी भन्दा सात तथा पाँचौं स्थानको म्यानचेस्टर युनाइटेड भन्दा तीन अंकले पछि छ ।
