काठमाडौं, २२ बैशाख। खानेपानी तथा सरसफाइमन्त्री जीवनबहादुर शाहीले सुद्धताको परीक्षण गराएर स्टिकर नटाँस्ने पानी ट्यांकरमाथि कारवाही गर्न निर्देशन दिएका छन् ।
पानीको नियमितपरीक्षण गरेर स्टिकर प्रणालीको प्रभावकारी कार्यान्वयन गर्न भन्दै मन्त्री शाहीले काठमाडौं उपत्यका खानेपानी व्यवस्थापन बोर्डलाई उक्त निर्देशन दिएका हुन् ।
खानेपानीको ट्यांकरमा अनिवार्य रुपमा स्टिकर टाँसेर मात्र बिक्रि वितरण गर्नुपर्ने व्यवस्था लागू गरेपपछि खानेपानी व्यवस्थापन बोर्डले पानी उत्पादन हुने स्थानमा नै गएर परीक्षण गर्न थालेको छ । आज मात्र गोदावरीबाट नियमित रुपमा पानी भर्दै आएका ६४ वटा ट्यांकरको पानी परीक्षण गरि स्टिकर प्रदान गरिएको छ । त्यसमध्ये अधिकाशं ट्यांकरले पहेलो स्टिकर प्राप्त गरेका छन् ।
पहेलो स्टिकर पाएका त्यस्ता ट्यांकरको पानी उमालेर मात्र पिउनका लागि योग्य मानिन्छ । सिधै पिउन मिल्ने पानीको ट्यांकरका निलो स्टिकर टाँसिन्छ त्यस्तो स्टिकर पाउनेमा काठमाडौं उपत्यका खानेपानी लिमिटेड (केयुकेएल) का १३ वटा ट्यांकर रहेका छन् । निजी क्षेत्रबाट संचालित ट्यांकरहरुले निलो स्टिकर नपाएकाले त्यस्ता ट्यांकरबाट लिएका पानी सिधै खान नमिल्ने समेत बोर्डले जनाएको छ ।
अहिलेसम्म १५० वटा ट्यांकरको पानीमा गरिएको परीक्षणमा अधिकांशमा पहेंलो स्टिकर टाँसिएको छ ।परीक्षणका क्रममा केहि ट्यांकरहरुमा हरियो स्टिकर समेत टाँसिएको छ । हरियो स्टिकर टाँसिएका ट्यांकर पानी पिउनका लागि अयोग्य हुन्छ । त्यस्तो ट्यांकरको पानी अन्य कामका लागि मात्र प्रयोग गर्न समेत आम नागरिक समक्ष मन्त्रालयले आग्रह गरेको छ ।
खानेपानी तथा सरसफाइ मन्त्री शाहीले अनुगमन र परीक्षणलाई प्रभावकारी बनाएर जनतालाई सहुलियतमा पानी उपलब्ध गराउने आफूहरुको दायित्व भएको भन्दै पानीको गुणस्तर र सुद्धतामा विशेष ध्यान दिनुपर्ने बताए ।
मन्त्री शाहीले पानी ट्यांकरहरुलाई व्यवस्थापन गर्न र जनतालाई सहज हुने गरि कानूनी प्रक्रियामा ल्याउन निर्देशन दिएपछि खानेपानी व्यवस्थापन बोर्डले बैशाख ५ गते देखि पानी बोक्ने ट्यांकरहरुमा अनिवार्य रुपमा स्टिकर प्रणाली लागू गरेको हो ।
पानीको सुद्धता कायम राख्न र नियमलाई प्रभावकारी रुपमा कार्यान्वयनमा ल्याउन मन्त्री शाहीले खानेपानी व्यवस्थापन बोर्डलाई निर्देशन दिएका छन् । गुणस्तर प्रमाणित नभई कुनै पनि ट्यांकरले पानी वितरण गर्न पाउने छैनन् । स्टिकर नभएको ट्यांकर प्रयोग गरेको भेटिए तुरुन्त कारवाही गर्ने मन्त्री शाहीले बताए ।
स्टिकर प्रणालीमा समावेश नभएका पानीका ट्यांकरबाट पानी वितरण गरेको भेटिए खानेपानी मन्त्रालयको टोल फ्री नम्बर १६६००१४२१११ मासम्पर्क गरेर उजुरी गर्न सकिन्छ। यो नम्बरमा फोन गर्दा पैसा लाग्दैन । त्यस्तो उजुरी परेपछि प्रहरीसँगको समन्वयमा खानेपानी मन्त्रालयले नियन्त्रणमा लिएर कारबाही प्रक्रिया अघि बढाउछ । संचालन अनुमति खारेज सम्मको कारवाही गर्न मन्त्रालयले बोर्डलाई निर्देशन दिईसकेको छ ।
काठमाडौं उपत्यका खानेपानी लिमिटेडबाट संचालित ट्यांकरहरु भने पूर्ण रुपमा स्टिकर प्रणालीमा समावेश भैसकेका छन् । ट्यांकरको हकमा पनि बैशाख मसान्तभित्र अन्य स्रोतबाट संचालित ट्यांकरहरुलाई परीक्षण गरेर स्टिकर टाँस्ने व्यवस्था मिलाउन मन्त्री शाहीले निर्देशन दिएका छन् । उक्त समयसीमा भित्र पनि अटेर गरेर बस्ने ट्यांकरलाई संचालन गर्न दिन नसक्ने र कारवाहीको दायरामा ल्याउने उनले बताए ।
मन्त्री शाहीले ट्यांकरमा भएको पानीको गुणस्तर र सुद्धताको आधारमा स्टिकर प्रदान गरिने भन्दै स्टिकर हेरेर मात्र ट्यांकरको पानीको प्रयोग गर्न सबै नागरिक सचेत हुनुपर्नेमा मन्त्री शाहीले जोड दिए ।
बैशाख मसान्तभित्र सबै ट्यांकरलाई स्टिकर टाँसी सक्ने खानेपानी व्यवस्थापन बोर्डले जनाएको छ ।
