काठमाडौं, २८ बैशाख । दुई दशक हुन लाग्यो स्थानीय निकायको निर्वाचन नभएको । काठमाडौं उपत्यकाका तीनवटै जिल्लामा चुनावी सरगर्मी बढेको छ । बाहिरी शहरभन्दा भित्री क्षेत्रमा चहलपहल बढी देखिन्छ ।
ललितपुर, भक्तपुरका भित्री बस्तीहरुमा पनि चुनावी सरगर्मी बढेको छ । गल्ली, चोक, पाटी–पौवाहरुमा दलहरुका झन्डाा, चुनाव चिह्न र उम्मेदवारहरुका फोटोसहितका तुल–ब्यानर, भण्डालेले ढाकिएका छन् । बस्ति घरहरु मानौं बेहुली सिँगारिएझैं देखिन्छन्। काठमाडौंका मुख्य सहहरु इन्द्रचोक, असन, नघःल, ब्रम्हटोललगायतका पुराना बस्तीहरु पनि चुनावमय बनेका छन् ।
यी बस्तीहरुमा उम्मेदवारहरुको दैनिक घरदैलो पनि निरन्तरजस्तो चल्ने गरेको छ । काठमाडौं भित्री वडाहरुमा प्रमुख दल नेपाली कांग्रेस, नेकपा एमाले, माओवादी केन्द्र, राप्रपा, संघीय समाजवादी फोरमबीचका उम्मेदवारहरुबीच नै चुनावी प्रतिस्पर्धाको वातावरण देखिएको छ । त्यस्तै ललितपुरका लगनखेल, पाटन, पुलचोक, जावालाखेल, सातदोबाटोपनि चुनावी सरगर्मी ह्वात्तै बढेको छ । ललितपुरको रिंगरोड क्रस गरेर अघि बढ्दा चुनावी चहलपहल झनै ह्वात्तै बढेको पाईयो ।
