साउन २८, काठमाडौँ । काठमाडौँ महानगरपालिकाले गत आर्थिक वर्ष २०७३÷७४ मा मनोरञ्जन करको शीर्षकमा एक रुपैयाँ पनि असुल गर्न सकेन ।
गत आर्थिक वर्षमा आठ हजार रुपैयाँ असुल गर्न सके पनि गत आर्थिक वर्षमा भने पैसा असुल गर्न नसकिएको हो । मनोरञ्जन व्यवसायीलाई कर तिर्नका लागि पटक पटक ताकेता गर्दा पनि कर तिर्न नआएको र सोहीअनुरुप कामपाले कारबाही गर्न नसकेकाले सो शीर्षकमा कर संकलन हुन नसकेको कामपा, राजस्व महाशाखा प्रमुख ध्रुव काफ्लेले बताउनुभयो ।
काठमाण्डौ महानगरपालिकाले गत आर्थिक वर्षमा मनोरञ्जन क्षेत्रको कर असूली रु १७ लाख तथा सोभन्दा अघिल्लो आवमा रु २५ लाख लक्ष्य लिएको थियो । यस क्षेत्रमा नियमित रुपमा कर असुल हुने हो भने वार्षिक रु २५ लाख आम्दानी हुन सक्छ । मनोरञ्जनमा मात्र वार्षिक रु २५ लाख बक्यौता हुने गरेको छ ।
चालु आवदेखि कामपाले यस क्षेत्रको बक्यौता पनि असुल गर्ने लक्ष्यसहित कडाइका साथ काम गर्ने जनाएको छ । गत आवमा विज्ञापन करमा भने रु ७२ लाख ७३ हजार लक्ष्य लिएको कामपाले लक्ष्यभन्दा निकै बढी रु सात करोड आम्दानी गरेको थियो । रासस
