Logo

अहिलेसम्मकै ठूलो परिणाममा सुन बरामद-(फोटोफिचर)



काठमाडौँ, १९ भदौ । महानगरीय अपराध महाशाखाले अहिलेसम्मकै ठूलो परिणाममा सुन बरामद गरेको छ ।

महाशाखाबाट खटिएको टोलीले ८८ किलो सुनसहित एकजनालाई बिहान २ बजे बा १७ च ६४२७ नम्बरको टाटा सफारी गाडीसहित क्षेत्रपाटीबाट पक्राउ गरेको हो । पक्राउ पर्नेमा मकवानपुर गढी गाउँपालिकाका २४ वर्षीय मनोज अधिकारी रहेका छन् ।

महाशाखाले आज पत्रकारसम्मेलन गरी काठमाडौँ महानगरपालिका–१७ मा पार्किङ गरेर राखेको अवस्थामा गाडीसहित अधिकारीलाई नियन्त्रणमा लिएको जनाएको छ ।

पत्रकार सम्मेलनमा महाशाखाका प्रमुख एवम् प्रहरी वरिष्ठ उपरीक्षक दिवेश लोहनीले रसुवाको केरुङ नाका हुँदै उक्त सुन काठमाडौँ भित्रिएको अनुसन्धानमा खुल्न आएको बताउनुभयो । “सुन कताबाट कता लैजान काठमाडौँ ल्याइयो भन्ने बारेमा थप अनुसन्धान भइरहेको छ,”–प्रमुख लोहनीले भन्नुभयो ।

उहाँले केरुङ नाकाबाट भित्रिएको सुनमा चीनीया नागरिकको सङ्लग्नता रहेको अनुसन्धानमा खुल्न आएको बताउनुभयो ।

प्रमुख लोहनीले केही दिन अगाडि नेपाल प्रहरीको केन्द्रीय अनुसन्धान ब्युरोले समातेको २२ किलो सुन कारोबारीसँग अहिलेको सुनको कारोबारीको सम्बन्ध छ वा छैन भन्ने बारेमा महाशाखाले अनुसन्धान गरिरहेको स्पष्ट पार्नुभयो । “सुन तस्करीमा एक÷दुई जनामात्र नभई ठूलो समूह रहेको छ, उनीहरुको चाँडै खोजी गछौँ”–लोहनीले भन्नुभयो ।

महाशाखाका प्रहरी उपरीक्षक नरेन्द्रप्रसाद उप्रेतीको नेतृत्वमा गएको टोलीले उक्त सुन बरामद गरेको हो ।

यसभन्दा पहिला ठूलो परिणाममा एक साता पहिले नेपाल प्रहरीको केन्द्रीय अनुुसन्धान ब्युरोले २२ किलो र गत वर्षको माघमा ३३ किलो वरामद गरेको थियो ।
यस्तै महाशाखाकै टोलीले अवैध मोवाइल तथा लत्ताकपडासहित तीनजनालाई पक्राउ गरेको छ ।

महाशाखाको टोलीले काठमाडौँ उपत्यकाभित्र केही व्यक्तिहरु भन्सार छली अवैधरुपमा मोवाइल तथा लत्ताकपडा चोरी पैठारी गरी भारतबाट काठमाडौँ ल्याएको अवस्थामा स्वयम्भुबाट पक्राउ गरेको हो ।

पक्राउ पर्नेमा सर्लाही घर भएका बसका चालक बलबहादुर दवाडी, काठमाडौँका जितेन्द्र डंगोल र दोलखाका सहचालक पासाङ लामा रहेका छन् ।
महाशाखाले पक्राउ परेकासँग विभिन्न कम्पनीका मोबाइल १३४ थान, कुर्ता टप्स एक हजार ६१३, फ्रक ३७, कटन पेन्ट १०१, लेहेन्गा १९, सारी १८, कुर्ता सुरुवाल ३७ र प्यारालाल सुरुवाल १२ थान बरामद गरेको छ । रासस  तस्विर : मुकुन्द कालिकोटे 



प्रतिक्रिया दिनुहोस्

https://pch.edu.np/

हल बुकिंग फाराम