ऋषि धमलालाई साझा उम्मेद्धवार बनाउन आज कांग्रेससँग निर्णायक कुरा हुन्छ : यादव

काठमाडौं, १४ कार्तिक । राष्ट्रिय जनता पार्टी नेपालका अध्यक्ष मण्डलका सदस्य महेन्द्रराय यादवले रिपोर्टर्स क्लब नेपालका सभापति ऋषि धमलालाई आफूहरुले २ नम्बर प्रदेशको जुनसुकै जिल्लाबाटपनि साझा उम्मेद्धवार बनाउने तयारी भएकोले आज अन्तिम निर्णय लिने स्पष्ट पारेका छन् ।

त्यस्तै उनले नेपाली कांग्रससँगको चुनावी तालमेल छलफलकै चरणमा रहेका बताएका छन् । नेपाली रेडियो नेटवर्कको कार्यक्रम नेपाली बहसमा कुरा गर्दै यादवले आज अन्तिम छलफल गरिने बताए । अहिलेसम्मको छलफलले केही पनि टुङ्गो नलागेको बताए ।

उनले पत्रकार धमलालाई आफूहरुले साझा उम्मेद्धवारको रुपमा प्रस्ताव गरिसकेकोले आज हुने कांग्रेससँगको छलफलमा यो विषय उठाउने स्पष्ट पारे । उनले थपे,‘ऋषि धमलाजीलाई जसरी पनि मधेशबाटै चुनाव उठाउनुपर्छ भनेर हामी लागिपरेका छौं, आज कांग्रेससँग यो विषयमा कुरा गर्छौं।’

कांग्रेसले आजसम्मको समय मागेकाले आज अन्तिम छलफल गरिने यादवको भनाई छ । फोरम र राजपाले जित्ने ठाउँमा तालमेल नगरिने यादवले बताएका छन् ।
तालमेलका लागि कांग्रेसको कोर्टमा बल भएको बताउँदै यादवले राजपा र फोरमको सहमतिलाई ख्याल गरेर तालमेलका लागि तयार हुनुपर्ने बताए ।
तीनवटै दल मिलेर उचित तालमेल गर्ने हो भने राम्रो नतिजा आउने तर बेग्ला बेग्लै चुनाव लड्ने हो भने २ नम्बर प्रदेशमा आफुहरुले कब्जा गर्ने यादवको दाबी छ ।
फोरमसँगको छलफल अन्तिम चरणमा पुगेको र आजै सहमति गरेर तालमेल टुङ्गो लगाइने यादवले जानकारी दिए ।
मधेशी जनताको अधिकार र पहिचान स्थापित गर्नका लागि नै मिल्नुपर्ने अवस्था रहेको यादवको भनाई छ ।