काठमाडौँ, ८ भदौ / खानेपानी तथा सरसफाइमन्त्री बीना मगरले सरकारले वैदेशिक रोजगारलाई ऐच्छिक बनाउन चाहिरहेको बताउनुभएको छ ।
गैरआवासीय नेपाली सङ्घको मध्यपूर्व सम्मेलनको आज युनाइटेड अरब इमिरेटसको दुबईमा उद्घाटन गर्दै उहाँले भन्नुभयो, “हरेक नेपाली युवा गाँस र बाँसका लागि विदेशिन नपरोस्, यसलाई अन्त्य गर्न सरकार योजनाबद्ध रुपमा अगाडि बढेको छ, जुन एकदमै चुनौतीपूर्ण काम हो ।”
मन्त्री मगरले वैदेशिक रोजगार ऐन र नियमावलीलाई कामदारको हितमा हुने गरी संशोधन प्रक्रिया अघि बढाइएको उल्लेख गर्दै नेपाली कामदारको हितको पक्षमा सरकार बलियो ढङ्गले उभिएको छ भन्नुभयो ।
“कोमामा रहेका नेपाली कामदारलाई फिर्ता लैजाने तयारी भइरहेको छ,” उहाँले भन्नुभयो, “परिवारले आफूले नै कोमाका बिरामीलाई ल्याउन र व्यवस्था गर्न सकेको छैन, अब कोमाको बिरामीको जिम्मेवारी सरकारले लिन्छ ।”
नेपाली काँग्रेसका नेता एवं पूर्वश्रममन्त्री रमेश लेखकले वैदेशिक रोजगार नेपालीका लागि बाध्यात्मक भएको उल्लेख गर्दै मुलुकमा तत्काल रोजगार सिर्जना गर्न सक्ने स्थिति नभएको र विदेश नै नजाउ भन्ने अवस्थामा सरकार नरहेको बताउनुभयो ।
युवालाई रोजगारी दिएर देशको विकास गरी मूल प्रवाहमा ल्याउने सम्भावना तत्कालै नभएकाले वैदेशिक रोजगारीमा आउनु परेको नेता लेखकको भनाइ छ ।
सङ्घका अध्यक्ष भवन भट्टले वैदेशिक रोजगारीमा गएका नेपाली कामदारको सामाजिक सुरक्षाको लागि ‘पेन्सन फन्ड’ तयार गर्ने अवधारणा ल्याएको जानकारी दिनुभयो ।
संस्थापक अध्यक्ष उपेन्द्र महतोले देशको आर्थिक समृद्धि भएमात्रै नागरिकको पनि समृद्धि हुने धारणा व्यक्त गर्नुभयो ।
युएईका लागि नेपालका कार्यबाहक राजदूत सागर फुयाँलले वैदेशिक रोजगारीमा आउने कामदारलाई सचेतना फैलाउन जरुरी रहेकोमा जोड दिनुभयो ।
आजदेखि शुरु भएको सो सम्मेलनमा कतार, साउदी अरब, बहराइन, ओमन, कुवेतलगायत मध्यपूर्वका देशबाट प्रतिनिधि सहभागी भएका छन् ।
सम्मेलनमा सुरक्षित र मर्यादित वैदेशिक रोजगारी, आप्रवासी कामदारको ज्ञान, सीप, विप्रेषण र उद्यमशीलतालगायत विषयमा छलफल हुनेछ । सङ्घका युएई अध्यक्ष रमेश श्रेष्ठले मध्यपूर्व क्षेत्रमा कार्यरत झण्डै २० लाख नेपालीको मुद्दा र सवालमाथि सम्मेलनले सम्बोधन गर्ने बताउनुभयो ।
सम्मेलन युएई घोषणापत्र जारी गर्दै शनिबार सकिने सङ्घले जनाएको छ । (रासस)
प्रतिक्रिया