तीजमा स्वस्थ्य र उद्यमी बन्न सन्देश

पोखरा । हिन्दू महिलाको महान् चाड हरितालिका तीज महँगा होटेलमा दरखाने त्यहीअनुरुप गर गहना एवं कपडाको बढ्दो प्रयोगले भड्किलो बन्दै गएको अवस्थामा यहाँको एक सञ्चारगृहले भने संस्कृतिलाई विकृति नबनाउन प्रेरित गर्दै स्वस्थ्य र उद्यमी बन्न सन्देश दिएको छ ।

महिला वर्गको मात्र लगानी, सक्रियता र सञ्चालनमा रहेको रेडियो जननीले निःशुल्क क्यान्सर रोग परीक्षण शिविर, जनचेतना ¥यालीसँगै उद्यमशीलताको विकासलाई तीज पर्वसँग जोडेको हो ।

‘आर्थिक समृद्धिका लागि उद्यमशीलतासँगै क्यान्सर सचेतना’ भन्ने मूल नाराका साथ स्थापनाकालदेखि रेडियो सामाजिक सेवामा समर्पित रहँदै आएको प्रवन्धक विमला भण्डारी बताउनुहुन्छ ।

रेडियोले वर्षभरि आफ्ना प्रचारप्रसारका सामग्रीमा समेत सर्वसाधारणलाई क्यान्सर रोग लाग्नाका कारण, उपचारका एवं आहारविहारका सम्बन्धमा सचेत गराउँदै स्वस्थ बनेर उद्यमशीलताको विकास गर्न महिला वर्गलाई प्रेरितसमेत गर्दै आएको उहाँको भनाइ छ ।

‘जननी तीज विशेष हस्तकला व्यापार मेला’ भन्ने मूल नाराका साथ रेडियोले तीन हजार महिलालाई उद्यमी तालीम प्रदान गरेको जननी रेडियोका संस्थापक अध्यक्ष हीरा भट्टराईले जानकारी दिनुभयो ।

‘स्वास्थ्य नै धन हो’ भन्ने सन्देश दिने उद्देश्यका साथ आयोजित शिविरमा महिलाको लागि निःशुल्क स्तन क्यान्सर परीक्षण, भिआइए परीक्षण गर्नुका साथै जनचेतना अभिवृद्धिका सामग्री बिक्री तथा प्रदर्शनी गरिएको रेडियोका सल्लाहकार एवं कार्यक्रम संयोजक लक्की कार्कीले जानकारी दिनुभयो ।

पोखरा महानगरपालिका र जिल्ला समन्वय समितिको सहयोग र नेपाल पर्यटन बोर्डको प्रवद्र्धनमा भएको कार्यक्रममा राष्ट्रिय तथा स्थानीय कलाकारले तीजगीत प्रस्तुत गरेर उपस्थित महानुभावलाई मनोरञ्जनसमेत प्रदान गर्नुभएको थियो ।

नेपालमा दिनप्रतिदिन क्यान्सर रोगका कारण महिला तथा पुरुषको स्वास्थ्य जोखिममा पर्दै गएको वर्तमान अवस्थामा रोगको न्यूनीकरणका साथै विशेष गरी महिलालाई उद्यमी बन्न रेडियोले निरन्तर अभियान सञ्चालन गर्दै आएको अध्यक्ष मिलन थापा बताउनुहुन्छ ।

वरिष्ठ क्यान्सर रोग विशेषज्ञ डा राजेन्द्रप्रसाद बरालले नेपालमा जनचेतनाको अभावले दिनप्रतिदिन बढेको क्याम्सर रोगको कारण वार्षिक १७ हजारले ज्यान गुमाउने गरेको उल्लेख गर्नुभयो ।

क्यान्सर रोग लागेको बिरामी अन्तिम अवस्थामा अस्पताल आउने गरेको कारण अपेक्षितरुपमा बचाउन नसकिएको बताउँदै उहाँले सुर्तीजन्य वस्तुबाट मात्र मुलुकमा ९० प्रतिशत क्यान्सर लाग्ने गरेको तथ्याङक दिनुभयो ।

गण्डकी प्रदेश प्रमुख बाबुराम कुँवरले मुलुकमा भयावह अवस्थामा देखिएको क्यान्सर रोगको न्यूनीकरणका लागि जनचेतना अपरिहार्य रहेको उल्लेख गर्दै त्यसका लागि सञ्चारमाध्यमको महत्वपूर्ण भूमिका रहने बताउनुभयो ।

पोखरा र आसपासका क्षेत्रमा पछिल्लो समय तीजपर्वलाई संस्थागत र सामूहिकरुपमा शुभकामना आदानप्रदान र रचनात्मक कार्य गरेर मनाउने प्रचलन बढेकोछ ।