पर्सा, भदौ २२ ।
एपीएफ टोलीद्वारा लागूऔषधसहित पक्राउ गरेको छ । बीरगंज महानगरपालिका १६ स्थित भन्सार मेनगेटबाट २१ भदौमा एपीएफ टोलीले विभिन्न किसिमका लागूऔषधसहित एक जनालाई पक्राउ गरेको हो । पक्राउ पर्नेमा बारा जिल्लाको जितपुर सिमरा उपमहानगरपालिका १७ बस्ने नरेश चौधरी रहेका छन् । उनलाई सशस्त्र प्रहरी बल, नेपाल नम्बर १४ गुल्म हेक्वा पर्साबाट खटिएको एपीएफ टोलीले पक्राउ गरेको हो । लु ४८ प ५२४८ नम्बरको मोटरसाइकलमा भारतबाट नेपालतर्फ आउँदै गरेका चौधरीले लुकाई छिपाई ल्याउँदै गरेको अवस्थामा डाईजोल्याव १७ वटा, नोफिन १७ वटा, फेनारगन १७ वटा र ब्राउनसुगर दुई पोका फेला परेपछि पक्राउ गरेको जनाएको छ ।
एपीएफ टोलीले पक्राउ परेका चौधरीलाई बरामद लागूऔषधसहित आवश्यक कारवाहीको लागि लागूऔषध नियन्त्रण व्यूरो कार्यालय बीरगंजमा बुझाएको छ ।
यसैगरी सशस्त्र प्रहरी बल, नेपाल बोर्डर आउट पोष्ट लौकहीबाट खटिएको एपीएफ टोलीले सुनसरी जिल्लाको भोक्राहा नरसिंह गाँउपालिका ६ स्थित ईसाराईलबाट २१ भदौमा विभिन्न किसिमका लागूऔषधसहित एक जनालाई पक्राउ गरेको छ । पक्राउ पर्नेमा सुनसरी जिल्लाको धरान उपमहानगरापलिका ३ बस्ने दिपेन लिम्बु रहेका छन् । को ३६ प १३२ नम्बरको स्कुटरमा भारतबाट नेपालतर्फ आउँदै गरेका उनलाई शंका लागि जाँच गर्दा डाईलेक्स १७ बोतल, स्पामो तीन सय ६० वटा र नाईट्रोजन ६० वटा फेला पारी पक्राउ गरिएको हो ।
एपीएफ टोलीले उनको साथबाट एक थान मोवाईल सेट र नगद १० हजार ६ सय ६० रुपैयाँ समेत बरामद गरेको जनाएको छ ।
