मुम्बई, माघ ११ । भारतीय टेलिभिजन कलाकार एवम् मोडल सेजल शर्माले शुक्रबार मृत अवस्थामा फेला परेकी छिन् । मुम्बई प्रहरीका अनुसार शर्माको घरबाट सुसाइड नोट फेला परेको छ ।
सेजल शर्मा स्टार प्लसको टेलिश्रृंखला ‘दिल तो हैप्पी है जी’मा अन्तिम पटक अभिनय गरेकी थिइन् । प्रहरीका अनुसार सेजल शर्माको घरबाट फेला परेको सुसाइड नोटमा निजी कारणले आत्महत्या गरेको उल्लेख छ ।
यो घटना शुक्रबार बिहानको हो । सेजल डिप्रेशनमा रहेको बताइएको छ । शर्मा मुम्बईको मीरा रोडको शिवार गार्डन परिसरस्थित रोयल नेस्ट सोसाइटीमा साथीहरूसँग बस्ने गरेकी थिइन् ।‘दिल तो हैप्पी है जी’ सेजल शर्माको पहिलो टेलिश्रृंखला थियो । उनी यसप्रति निकै उत्साहित रहेको उनका सहकर्मीहरूले बताएका छन् ।
यसभन्दा पहिले सेजल शर्माले विभिन्न ब्राण्डको विज्ञापनमा काम गरेकी थिइन् । उनी आमिर खान तथा रोहित शर्मा र हार्दिक पाण्ड्यासँग पनि विज्ञापनमा साथ देखिएकी छन् ।
