काठमाडौं, ७ असार । नेपाल कम्युनिस्ट पार्टीका अध्यक्ष समेत रहेका प्रधानमन्त्री केपी शर्मा ओली चौतर्फी घेराबन्दीमा परेका छन् । यसबारे स्वयं ओलीले आफ्ना विश्वासपात्रहरुसँग छलफल गर्न थालेका छन् । ओलीले बाह्य शक्ति देखि पार्टीभित्रको आन्तरिक शक्तिले घेराबन्दीमा पारेको निष्कर्षसहित तोड्नेबारे आन्तरिक परामर्श थालेको विश्वस्त स्रोतले बताएको छ ।
सरकार दुई वर्ष पुरा भएपछि एकपछि अर्को चुनौतीहरु थपिइरहेको छ । लकडाउन अघि र लगत्तै सरकार ढाल्ने खेलहरु भएका थिए । त्यसलाई ओलीले विफल पारिदिए । यसपटक उनका लागि घेराबन्दी तोड्न निकै कठिन हुन थालेको छ ।
ओलीलाई घेराबन्दीमा पार्न अमेरिकी सहयोग सम्बन्धी मिलेनियम च्यालेन्ज कर्पोरेशन (एमसीसी) को विषय पेचिलो बनाइएको छ । उनीविरुद्ध नेकपाका स्थायी कमिटिका पाँचजना स्पष्ट रुपमा एकजुट भएका छन् । ती सबै नेकपाका हेविवेट हुन् । अध्यक्ष पुष्पकमल दाहाल प्रचण्ड, वरिष्ठ नेताहरु झलनाथ खनाल र माधवकमार नेपाल, उपाध्यक्ष बामदेव गौतम र प्रवक्ता नारायणकाजी श्रेष्ठ एमसीसीका नाममा ओलीविरुद्ध एकजुट भएका छन् । एमसीसीको विपक्षमा रामबहादुर थापा बादल पनि छन् । त्यसैले सचिवालयका दुई तिहाई ओलीविरुद्ध छन् ।
यसपटक घेरा तोड्न ओलीलाई हम्मे पर्ने देखिएको छ । एमसीसी पारित गराउन लागिपरे चीन चिढिने संकेतहरु मिलिसकेको छ । अमेरिकी रणनीतिक कुनैपनि योजनाविरुद्ध चीनले चुनौती दिइसकेको छ । उसले आफूलाई घेर्न अमेरिकाले एशियामा रणनीति चालेको सञ्चारमाध्यमहरुमार्फत् विषय बाहिर ल्याइरहेको छ । यस्तो अवस्थामा एमसीसी पारित गर्दा चीन चिढिनसक्छ । चीनले नै ओलीको सत्ता जोगाइदिएको विषय अझै चर्चामा छ ।
एमसीसी पारित नभए अमेरिकाको साथ नमिल्ने अवस्था बन्न सक्छ । यसबारे ओली निकै गम्भीर भएका छन् । एमसीसी पारित गर्न नसके ओलीले भित्री खेल खेलेको बुझाई पश्चिमाहरुको हुनसक्छ ।
अर्को छिमेकी भारत ओलीसँग चिढिएको छ । नयाँ नक्शा देखि पछिल्लो समय उठेका कतिपय विषयमा भारत गम्भीर भएको छ । बाह्य चुनौती ओलीका सामु बढिरहेको छ ।
अब ओलीले घेराबन्दी तोड्ने बाहय र आन्तरिक व्यवस्थापन गर्ने प्रयास गरिरहेका छन् । बाह्य शक्तिलाई साथमा लिने र आन्तरिक रुपमा पार्टीका कुनै एक हेभिवेटलाई साथमा लिने हुनसक्छ । ओलीलाई बामदेवले साथ छाडिसकेका छन् । प्रचण्डलाई मनाउने या माधवकुमार नेपाललाई फकाउने हुनसक्छ । यो पनि अब टर्दै गएको छ । यस्तो अवस्थामा ओलीका लागि सत्ता टिकाउन निकै चुनौती बन्दै गएको छ । उनले मन्त्रिमण्डलमा फेरबदल गरेर भएपनि व्यवस्थापन गर्ने तयारी गरिरहेको स्रोतले बताएको छ । तर, यी सबै प्रयासहरु यसपटक सफल हुन कठिन बन्दै गएको छ ।
