काठमाडौं , १९ असार । विभिन्न बहुमुल्य धातु जस्तो देखिने पत्थर सहित २ जनालाई बिहीबार दिउँसो प्रहरीले पक्राउ गरेको छ । काठमाडौं महानगरपालिका स्वयम्भू भगवानपाँउस्थित सडकबाट सुन जस्तो देखिने पहेलो रंगको धातुमा हिरा जस्तो देखिने पत्थर ठुलो १ थान, सानो पत्थर १९ थान, निलम जस्तो देखिने पत्थर १३ थान, पन्ना जस्तो देखिने पत्थर १९ थान र रुबी जस्तो देखिने पत्थर २२ थान सहित २ जनालाई बिहीबार दिउँसो प्रहरीले पक्राउ गरेको छ ।
पक्राउ पर्नेहरुमा काठमाडौं टोखा नगरपालिका धापासी बस्ने सुनसरी धरान महानगररपालिका घर भएका बिक्रम सिंह चौधरी र टोखा नगरपालिका बस्ने गोरखा धार्चे गाउँपालिका घर भएका सुरेश घले रहेका छन् । उक्त स्थानमा बहुमुल्य धातु हिराको कारोबार हुन लागिरहेको भन्ने बिशेष सूचनाको आधारमा महानगरीय प्रहरी वृत्त स्वयम्भूबाट खटिएको प्रहरीले बा.७७ प ८५८७ नम्बरको मोटरसाइकल जाँच गर्ने क्रममा मोटरसाइकलमा सवार उनीहरुलाई उक्त धातु सहित फेला पारी पक्राउ गरेको हो । यस सम्बन्धमा प्रहरीले थप अनुसन्धान गरिरहेको जनाएको छ ।
