मङ्गलबारे, ७ असोज: थुनुवालाई कोरोना भए नभएको यकिन गरेर मात्र कारागार प्रवेश गराउनुपर्ने अदालतको आदेश पालना हुन नसकेको इलाम कारागारका कैदीले राष्ट्रिय मानवअधिकार आयोगका पदाधिकारीसमक्ष गुनासो गरेका छन् । मानवअधिकार आयोगका सदस्य सुदीप पाठक नेतृत्वको टोलीसमक्ष कैदीहरुले क्षमताभन्दा बढी कैदी रहँदा भएको समस्यालगायतका विषयमा जानकारी गराएका हुन् । कारागारमा कोरोना भाइरसपछिको बदलिँदो अवस्थाबारेमा अनुगमनका क्रममा पाठकसहितको टोली इलाम आएको हो ।
मानवअधिकार आयोगका पदाधिकारीको टोलीले इलाम कारागारको अनुगमन गरेको सहित सरोकारवालासँग छलफलसमेत गरेको छ । कारागारमा आइसोलेसन र क्वारेन्टिन छ या छैन भन्नेबारे साथै यसको गुणस्तरका विषयमा अनुगमन गरिएको हो । कारागारमा रहँदा कोरोनापछि भोग्नुपरेका समस्या र कोभिडले निम्त्याएको असरका विषयमा सरोकारवालासँग छलफल गरिएको थियो । कारागारका कैदीले आन्तरिक प्रशासनअन्तर्गत पाउनुपर्ने सेवासुविधा विगतका दिनमा पाए पनि हाल नपाएको भन्दै गुनासो गरेका छन् । कैदीका तर्फबाट आयोगका पदाधिकारीलाई नौँ बुँदे ध्यानाकर्षणपत्रसमेत बुझाइएको छ ।
सो कारागार १२० कैदी अटाउन सक्ने क्षमताको भए पनि २४० बढी कैदी भएका कारण समस्या भएको कैदीहरुको भनाइ छ । प्रमुख जिल्ला अधिकारी तुलसीराम सेढाईँले कानूनी केही बाधा रहे पनि व्यवहारिक पक्षमा समेत ध्यान दिएर काम गर्ने गरेको बताए । त्यस्तै जिल्ला प्रहरी कार्यालयका प्रमुख नवीनराज राईले इलाममा असहज परिस्थिति नरहेको बताए । उनले थुनुवा तथा कैदीको खचाखचको स्थिति नरहेको जानकारी गराए ।
कारागार अनुगमनपछि जिल्ला प्रशासन कार्यालयमा सरोकारवालासँग छलफलका क्रममा कारागारका तर्फबाट जेलर प्रदीप श्रेष्ठले कोरोना भाइरसको सङ्क्रमणबाट बाहिरी भेटघाट बन्द गरिएको बताए । उनले स्वास्थ्यकर्मीको दरबन्दी भए पनि कर्मचारी नहुँदा समस्या नभएको जानकारी गराए ।
कारागारमा गाडीको व्यवस्था नहुँदा झनै समस्या भएको उनको भनाइ छ । त्यस्तै जिल्ला सरकारी वकिल युवराज महतले कोरोना सङ्क्रमण शुरु भएपछि कारागार र अदालतमा भीडभाड कम गराउन प्रयत्न भएको बताएका थिए । कानूनी केही बाधा रहे पनि सहजीकरण भइरहेको उनको भनाइ छ । मानवअधिकार आयोगले मङ्गलबारबाट झापासहित इलाम हुँदै देशका २७ जिल्लाको अनुगमन गर्ने गरी काम थालेको हो ।-रासस/File Photo
