भक्तपुर, मंसिर २५ । नक्कली सवारी चालक अनुमतिपत्र (लाइसेन्स) र नक्कली नागरिकतासहित भक्तपुरबाट एक जना पक्राउ परेका छन् । महानगरीय ट्राफिक प्रहरी महाशाखाको टोलीले बुधबार मध्यपुर ठिमी नगरपालिका–६ ठिमीबाट उनलाई पक्राउ गरेको हो ।
पक्राउ पर्नेमा सिन्धुपाल्चोक साँगाचोकगडी नगरपालिका–१२ घर भई मध्यपुर ठिमी–७ बस्ने २८ वर्षीय आशिष गिरी रहेका छन् ।
प्रहरीले उनले चलाउँदै आएको बा१५च ४६८४ नम्बरको हुन्डाई कम्पनीको कार पनि नियन्त्रणमा लिएको छ । उनको साथबाट विभिन्न नागरिकका नाममा जारी भएको नागरिकताको प्रतिलिपि ४ थान, सवारी चालक अनुमतिपत्र २ थान, सवारी चालक अनुमतिपत्रको कर तिरेको रसिद एक थान, सवारी चालक विवरणको कागज ५ थान, विभिन्न बैंकको २५ लाख रुपियाँ बराबरको चेक ४ थान, मोबाइल ३ थान र नगद ४१ हजार ५ सयसमेत बरामद गरिएको महानगरीय प्रहरी परिसर भक्तपुरले जनाएको छ ।
