पुष २, काठमाण्डौ । शुक्रबारदेखि काठमाडौं उपत्यकामा सार्वजनिक तथा निजी सवारीमा लगाइएको जोरबिजोर प्रणाली हट्ने भएको छ । सबैजसो व्यवसाय र कार्यालय खुला भइसकेको अवस्थामा पनि सवारी साधनमा लगाइएको जोर बिजोरको नियम हटाइएको थिएन । जसका कारण आधा संख्यामा मात्रै सार्वजनिक सवारी सधान गुडेका थिए । तर यात्रुको चाप भने बढेको थियो । जसले गर्दा सवारी साधानमा कोचाकोच गरेर यात्रुल चढ्दा कोरोना संक्रमणको जोखिम झन बढेको थियो ।
जोर विजोर नियमका कारण सर्वसाधारण कोरोनाको जोखिममा मात्रै होइन, उनीहरुको यात्रा पनि निकै कष्टकर भएको थियो । कोरोनाको जोखिम कम गर्न अपनाउनुपर्ने स्वास्थ्य सुरक्षाका मापदण्ड पनि पालना भएको थिएन ।
जोर बिजोर नियमको उल्लङ्घन गरेको भन्दै ट्राफिक प्रहरीले सवारी साधन नियन्त्रणमा लिई चालकलाई फिर्ता पठाउँने थियो । जोर बिजोर नियमको पालना नगरेको भन्दै दैनिक करिब एक हजार पाँच सय सवारी साधन कारबाहीमा पर्ने गरेको महानगरीय ट्राफिक प्रहरी महाशाखाले जनाएको छ ।
काठमाण्डौ जिल्ला प्रशासन कार्यालयले जोर विजोर नियमले निम्त्याएको समस्यालाई मध्यनजर गरिरहेको थियो । फलत शुक्रबारदेखि नै लागु हुने गरी उक्त नियम हटाइएको छ । जिल्ला प्राशसन कार्यालय काठमाडौंमा बसेको सरकारोवाला निकाय र विभिन्न यातायात व्यवसायी र मजदुरका संघ संस्थाका प्रतिनिधिको बैठकले सार्वजनिक सवारीमा जोर बिजोर कायम गर्दा झनै भीड बढेको निष्कर्ष निकालेको थियो ।
जोरबिजोर हटाउने निर्णयसँगै शुक्रबारबाट सबै सार्वजनिक तथा निजी सवारी सडकमा गुड्न पाउनेछन् । तर तोकिएको स्वास्थ्य मापदण्ड पालना गर्नुपर्ने हुन्छ ।
