जनकपुर, ३१ असोज । भाउजुले आफ्नी पत्नीको गर्भ तुहाउन टुनामुना लगाउन खोजेको अन्धविश्वासमा देवरको मनमा अपराध कर्म जाग्यो । उनले भाउजुको हत्या गरे ।
यो घटना महोत्तरीको मडैकामा भएको हो । जहाँ ४२ वर्षीय सञ्जय कुमार झाले आफू जतिकै उमेरकी भाउजुको हत्या गरे ।
२७ असोजमा झाले ४२ वर्षीया शिलादेवी झाको टाउकोमा हतौडा प्रहार गरी हत्या गरेका हुन् । हत्याको अभियोगमा उनलाई पक्राउ गरिएको जिल्ला प्रहरी कार्यालय महोत्तरीले जनाएको छ ।
झाले बयानमा भाउजुले केरा खुवाएर आफ्नी पत्नी रिंकु देवी झाको गर्भ तुहाएर मार्न खोजेको आरोप लगाएका छन् ।
