काठमाडौं, ४ मंसिर । नेकपा (एमाले) का उपाध्यक्ष युवराज ज्ञवालीले आफू एमाले छोडेर अब कतैपनि नजाने बताएका छन् । बरु, साधारण सदस्य भएर बस्ने तर एमाले नछोड्ने उनको भनाई छ । हिजो राति प्राइम टिभीबाट प्रसारण भएको जनता जान्न चाहन्छन् कार्यक्रममा पत्रकार ऋषि धमलासँग कुरा गर्दै उनले आफूहरु पार्टीको १०औं महाधिवेशनको तयारीमा लागिसकेको सुनाए ।
उनले आगामी महाधिवेशनमा अध्यक्षमा केपी शर्मा ओली निर्विरोध हुनपनि सक्ने र नहुन पनि सक्ने दुवै सम्भावना रहेको सुनाए । उनले भने,‘मेरो व्यक्तिगत चाहना भनेको के छ भने एकदम प्रष्ट रुपमा म बताउन चाहन्छु, अहिले नेकपा एमाले एकदमै विशिष्ट अवस्थामा छ । त्यो के हो भने एमाले विभाजित छ । एमालेबाट विभाजित भएर माधव नेपाल, झलनालगायतका नेताहरुले अर्को पार्टी बनाउनुभएको छ । एउटा समस्या यो छ, त्यसले नेकपा एमालेलाई कमजोर बनाउने, कमरेड माधव कुमार नेपालले त एमालेलाई धुलो चटाउने भनेर हिँडिरहनुभएको छ । अर्को कुरा, एमालेको विरुद्धमा कांग्रेसलगायत पाँच दलीय गठबन्धन अगाडि बढेको छ । एमालेलाई पराजित गर्न सबै मिलेर जानुपर्छ भनेर उहाँहरुले भन्नुभएको छ । यो पनि अर्को एउटा समस्या हो। अहिले एमालेको जीवनमा एउटा विशेष खालको छुट्टै अवस्था उत्पन्न भएको छ । यसलाई समाधान गर्नको लागि सोहीअनुसार राष्ट्रिय महाधिवेशनबाट नेतृत्व चयन गर्नुपर्छ । आगामी दिनमा एमालेलाई एकताबद्ध बनाउनुपर्छ । ओलीजीले पनि एकताबद्ध बनाउनुपर्छ ।’
उनले पार्टी पँक्तिलाई एकताबद्ध बनाउनको लागि नेतृत्वले सुझबुझका साथ कदम चाल्नुपर्ने बताए । उनले ओलीको नेतृत्वमा अघि बढ्दा पार्टीलाई फाईदा हुने विश्वास दिलाए। उनले अब नेताहरुले सबै परिस्थितिको गम्भीर रुपमा विश्लेषण र आत्मसमिक्षा गरेर अब पार्टीलाई नयाँ ढंगले अघि बढाउने विषयमा नयाँ चेतनाको आधारमा अघि बढ्न नसके पार्टीलाई ठूलो क्षति हुने खतरा पनि औंल्याए । उनले आफू एमाले छोडेर कतै पनि नजाने स्पष्ट पारे । उनले आवश्यक परे महत्वपूर्ण जिम्मेवारी लिने पनि सुनाए । तर, जिम्मेवारी नै नपाएपनि साधारण सदस्य भएर बस्ने तर पार्टी नछोड्ने जिकिर गरे ।
