काठमाडौं, १० मंसिर । नेकपा एमालेको महाधिवेशन रोचक बन्ने देखिएको छ । अध्यक्षमा केपी शर्मा ओली र भीम रावलबीच प्रतिष्पर्धा हुने निश्चितप्रायः भएको छ ।
पदाधिकारीहरुमध्ये वरिष्ठ उपाध्यक्ष, उपाध्यक्ष, महासचिव, उपमहासचिव र सचिवहरुमा आकांक्षी धेरै देखिएका छन् । यसकारण ओली समूह नै अध्यक्षबाहेकको पदमा विभाजित छ ।
वरिष्ठ उपाध्यक्षमा महासचिव ईश्वर पोखरेल र स्थायी कमिटी सदस्य सुवास नेम्वाङको दाबी रहेको छ । नेम्वाङले काठमाडौंमा रहँदा नै उम्मेदवारी घोषणा गरिसकेका छन् ।
महासचिवमा विष्णु पौडेल, शंकर पोखरेल र सुरेन्द्र पाण्डेको मुख्य दाबी छ । पौडेल र पोखरेल ओलीका विश्वासपात्र हुन् ।
पदाधिकारीका दाबेदार ओली पक्षले गुट बनाइसकेका छन् । एउटा गुटको नेतृत्व ईश्वर पोखरेलले गरेका छन् । अर्को गुटको नेतृत्व नेम्वाङले गरेका छन् ।
ईश्वर पोखरेलको समूहमा शंकर पोखरेल, प्रदीप ज्ञवाली, रघुवीर महासेठ, विष्णु रिमाल, कृष्णगोपाल श्रेष्ठ, भानुभक्त ढकाल, खगराज अधिकारी, राजन भट्टराई, गोकुल बाँस्कोटा जस्ता नेताहरु छन् ।
सुवास नेम्वाङले नेतृत्व गरेको समूहमा उपमहासचिव विष्णु पौडेल, सचिव पृथ्वी सुब्बा गुरुङ, प्रभावशाली नेताहरु महेश बस्नेत, किरण गुरुङ, हिक्मत कार्की, निरुदेवी पाल, रामेश्वर फुयाँललगायत छन् ।
ओली समूहका दुई गुटमध्ये ईश्वर पोखरेलसँग सांगठनिक पकड छ । पार्टीमा लामो समय बिताएका उनलाई विचारको राजनीतिक गर्ने शंकर पोखरेल र प्रदीप ज्ञवाली जस्ता नेताहरुको साथ छ । यो गुटलाई पुराना एमाले नेताहरुको साथ रहने देखिन्छ ।
नेम्वाङ समूहमा जुझारु शैलीका नेताहरु छन् । पृथ्वी सुब्बा गुरुङ, महेश बस्नेत, निरुदेवी पालसँग जुझारु स्वभाव छ । यो समूहलाई नयाँ पुस्ताका प्रतिनिधिको बढी साथ रहने देखिएको छ ।
ओलीइतर समूहको नेतृत्व भीम रावलले गरेका छन् । रावलको समूहमा नेताहरु खासै नखुलेपनि अष्टलक्ष्मी शाक्य, युवराज ज्ञवाली, सुरेन्द्र पाण्डे, गोकर्ण बिष्ट, भीम आचार्य, रघुजी पन्त जस्ता हस्ती नेताहरु रहने सम्भावना बढी छ । योगेश भट्टराई अोलीसँग नजिकिएकाले रावलको साथ देखिने सम्भावना कमजोर छ । उनी यसपटक पनि सचिव पदको उम्मेदवार बन्ने घोषणा गरेका छन् ।
