एजेन्सी, २४ असार । बलिउड अभिनेत्री रिया चक्रवर्ती छिट्टै बंगाली फिल्म निर्माता राणा सरकारसँग काम गर्ने सम्भावना छ । हालै राणाले एक अन्तर्वार्तामा यसबारे कुरा गर्दै रिया आफ्नो फिल्मका लागि एकदमै फिट रहेको बताए । साथै उनले रियाको करियर बिना दोष नै बर्बाद भएको पनि बताए ।
राणाले भने, ‘फिल्मका लागि रियाका म्यानेजरसँग सम्पर्कमा छु, तर उनले अहिलेसम्म निर्णय गरेका छैनन् । हामीसँग स्क्रिप्ट तयार छ र यसमा रिया मुख्य अभिनेत्रीको रूपमा फिट हुन्छिन्। यो फिल्मको कथा धोकासँग जोडिएको छ । रिया धाराप्रवाह बंगाली बोल्छिन् र यदि उनले यो फिल्म गर्ने हो भने, यो राम्रो हुनेछ।
राणा सरकार भन्छन्, ‘विना दोष रियाको करियर जोखिममा परेको महसुस भएको छ । पछिल्ला केही वर्षमा उनी धेरै समस्याबाट गुज्रिरहेकी छिन् र उनले अझै मुम्बईमा भूमिका पाइरहेका छैनन् । कसैको गर्लफ्रेन्ड भएर बंगाली भएको कारणले उनलाई दुःख छ । मलाई साँच्चै लाग्छ कि उनी अझ राम्रोको योग्य छिन्।’
‘जलेबी’ पछि रिया मिस्ट्री थ्रिलर ‘चेहरे’मा मात्र देखिएकी थिइन् । २०२१ मा रिलिज भएको यो फिल्ममा उनी बाहेक अमिताभ बच्चन, इमरान हाश्मी र सिद्धान्त कपूर पनि मुख्य भूमिकामा थिए। रियाले सन् २०१३ मा फिल्म मेरे पिता की मारुतीबाट बलिउडमा डेब्यु गरेकी थिइन् । यसअघि रिया भिडियो जकीको रुपमा काम गर्थिन् ।
रियाका प्रेमी सुशान्त सिंह राजपुतको १४ जुन २०२० मा मुम्बईमा निधन भयो। त्यसबेलादेखि एनसीबी लागूऔषध मुद्दामा अनुसन्धान थालिएको थियो र रिया चक्रवर्तीलाई सेप्टेम्बर २०२० मा पक्राउ गरिएको थियो। झण्डै एक महिना जेल बसेपछि रियाले मुम्बई उच्च अदालतबाट जमानत पाएकी थिइन् । सुप्रिम कोर्टको आदेशमा सीबीआईले यस विषयमा अनुसन्धान गरिरहेको छ । तर, अहिलेसम्म एजेन्सी कुनै नतिजामा पुग्न सकेको छैन ।
