वीरगञ्ज, १९ वैशाख । जम्मू–कश्मीरको पहलगाममा भएको आतंकवादी आक्रमणको विरोधमा आयोजित शान्तिपूर्ण विरोध र्यालीमा स्थानीय प्रशासनद्वारा अवरोध सिर्जना गरिएकोप्रति राष्ट्रिय एकता अभियानले कडा आपत्ति जनाएको छ। राष्ट्रिय एकता अभियानले बाराको सिमरादेखि पर्साको वीरगञ्जसम्म बिहीवार आयोजना गरेको र्यालीमा प्रहरीले जितपुर नजिकै हस्तक्षेप गरी केही प्रदर्शनकारीलाई नियन्त्रणमा लिएको थियो। यद्यपि, अभियानका कार्यकर्ताहरू वैकल्पिक मार्ग प्रयोग गर्दै वीरगञ्जको ऐतिहासिक घण्टाघरसम्म पुग्न सफल भएका थिए र त्यहाँ विरोध प्रदर्शन सम्पन्न गरेका थिए।
अभियानका अध्यक्ष विनय यादवले जारी गरेको प्रेस विज्ञप्तिमा यस कार्यलाई अभिव्यक्ति स्वतन्त्रताको हनन भन्दै प्रशासनको अमानवीय र अलोकतान्त्रिक व्यवहारको घोर निन्दा गरिएको छ। विज्ञप्तिमा भनिएको छ, “हाम्रो प्रदर्शन पूर्णतः शान्तिपूर्ण थियो, जसको उद्देश्य पहलगाममा ज्यान गुमाएका सुरक्षाकर्मी, नागरिक र नेपाली नागरिक सुदीप न्यौपानेप्रति श्रद्धाञ्जली अर्पण गर्नु र आतंकवादविरुद्ध अन्तर्राष्ट्रिय जगतमा सन्देश दिनु हो।”
राष्ट्रिय एकता अभियानले नेपाल सरकार र सम्बन्धित निकायहरूलाई तत्काल छानबिन गरी दोषी अधिकारीमाथि कडा कारबाही गर्न माग गरेको छ। साथै, सरकारले आतंकवादविरुद्ध स्पष्ट अडान लिनुपर्ने र अन्तर्राष्ट्रिय मञ्चहरूमा आवाज उठाउनुपर्ने माग पनि राखिएको छ।
अन्त्यमा, अभियानले वीरगञ्जका नागरिकहरूलाई शान्तिपूर्ण ढंगले आतंकवादविरुद्धको आवाजमा सहभागी हुन आह्वान गरेको छ।
प्रतिक्रिया