प्रभु साहको आरोप : केपी ओली भ्रष्टाचारीहरुको सरदार हो (भिडिओसहित)

काठमाडौं, ९ साउन । आम जनता पार्टीका अध्यक्ष तथा पूर्वमन्त्री प्रभु साहले वर्तमान प्रधानमन्त्री केपी शर्मा ओलीलाई भ्रष्टाचारीहरुको सरदारको संज्ञा दिएका छन् । उनले प्रधानमन्त्री ओलीले भ्रष्टाचार र विभेद गर्ने कुरामा विश्व रेकर्ड नै बनाईसकेको आरोप लगाए ।

हिजो (बिहीबार) राति प्राइम टिभीबाट प्रसारण भएको ‘जनता जान्न चाहन्छन्’ कार्यक्रममा पत्रकार ऋषि धमलासँगको कुराकानीमा उनले अहिलेको सरकारले विकास गर्न नसकेको आरोप लगाए । साहले कांग्रेस–एमालेको वर्तमान सरकारले एउटा पनि राम्रो काम गर्न नसकेको आरोप लगाएका छ्न । उनले केपी शर्मा ओली नेतृत्वको वर्तमान सरकार लुट्नको लागि मात्रै बनेको गम्भीर आरोप लगाए । अब कांग्रेस र एमालेका इमानदार नेता तथा कार्यकर्ताहरुले सरकारको विकल्प खोज्नुपर्ने र आफ्नो क्षमता देखाउनुपर्ने सुझाए ।

उनले अहिलेको सरकारले देशमा लोकतन्त्र सिध्याउन थालेको गम्भीर आरोप लगाए । देश, लोकतन्त्र र जनता बचाउनको लागि अहिलेको सरकारलाई विस्थापित गरिनुपर्ने उनको मत छ । साहले भने,‘देश बचाउनको लागि, जनताको भविष्य बचाउनको लागि र लोकतन्त्रको रक्षाको लागि यो सरकारको विकल्प दिन भनिरहेका छौं । यो गठबन्धन वा त्यो गठबन्धनको मात्रै कुरा होईन । मैले त यो सरकारलाई केपी ओली र शेरबहादुर देउवाको अनैतिक सरकार भनेको छु । कम्तिमा लोकतन्त्रमा टेकेको सरकार हुनुपर्छ । हिजो कांग्रेस र एमाले अलग अलग गठबन्धन र एक अर्काविरुद्ध चुनाव लडेका थिए । निर्वाचन आयोगले यी पार्टीहरुलाई खारेज गर्नुपर्दथ्यो । दललाई नियमन गर्नुपर्ने थियो । जनताप्रति जवाफदेही बनाउनुपर्ने थियो ।’

उनले भने,‘यो सरकारले गरेको एउटा मात्रै पनि राम्रो काम मलाई देखाउनुहोस् त, यो सरकारले त आँफै भन्यो नि सरकार फेल छ । प्रधानमन्त्री कार्यालयबाट भएको कार्यसम्पादन मूल्यांकनमा यो सरकार फेल भएको छ । आर्थिक अवस्था डामाडोल छ । सबै सचांकक गलत छ । उहाँले मिथ्या प्रचार गरिरहनुभएको छ । हामीलाई अनुदान दिने कोही आएन । ऋण दिने कोही आएन । आयात र निर्यातको ठूलो असन्तुलन भएको छ । ऋणमात्रै बोकाईएको छ । ऋण घटाउने होईन, बढाउनेमात्रै काम गरेको छ ।’ मेहन्द्र राजमार्ग विगत ८ वर्षदेखि लथालिङ् भएको र अस्वभाविक रुपमा म्याद थपेर गलत काम गरिएको उनको आरोप छ ।