चार मन्त्रीको नियुक्ति र शपथ आजै, संगिताको नाम ‘होल्ड’ मा

काठमाडौं, ६ भदौ । प्रधानमन्त्री सुशीला कार्कीले चार मन्त्री नियुक्तिको तयारी थालेकी छन् । राष्ट्रपति कार्यालय स्रोतका अनुसार प्रधानमन्त्री कार्कीले मन्त्री नियुक्तिको लागि ५ जनाको नाम पठाएको भए पनि डा.संगीता कौशल मिश्राको नाम होल्ड भएको छ ।

प्रधानमन्त्री कार्कीले शिक्षा, विज्ञान तथा प्रविधि मन्त्रीमा महावीर पुन, उद्योग तथा भूमिसुधार मन्त्रीमा अनिलकुमार सिन्हा, सञ्चार, सूचना तथा प्रविधि मन्त्रीमा जगदीश खरेल र कृषिमन्त्रीमा डा.मदन परियारलाई सिफारिस गरेकी छन् । उनीहरुको नियुक्ति र शपथ आजै हुने बताइएको छ ।

स्वास्थ्य तथा जनसंख्या मन्त्रीमा सिफारिस भएकी डा.मिश्राले अतिरिक्त सचिवको पदबाट राजीनामा दिएर मन्त्री बन्ने तयारी गरेकी थिईन् । अख्तियार दुरूपयोग अनुसन्धान आयोगले डा. मिश्राविरूद्ध छानबिन गरिरहेको थाहा पाएपछि प्रधानमन्त्री कार्कीले नियुक्ति अगाडि नबढाउने मनस्थिति बनाएको बताइएको छ । चार मन्त्रीहरुको शपथ भने आज दिउँसो ३ बजेको लागि तय भएको छ ।

प्रधानमन्त्री कार्कीले. यसअघि ऊर्जा तथा जलस्रोत मन्त्रीमा कुलमान घिसिङ, अर्थमन्त्रीमा रामेश्वर खनाल र गृहमन्त्रीमा ओमप्रकाश अर्याललाई नियुक्त गरिसकेकी छन् । प्रधानमन्त्री कार्कीले यसअघि नै नौ सदस्यीय मन्त्री परिषद् बनाउने घोषणा गरिसकेकी छन् । प्रधानमन्त्री कार्कीको क्याबिनेटमा स्वाथ्यमन्त्रीको अर्को सम्भावित पात्रको बारेमा छलफल भइरहेको बताइएको छ ।