डा. उपेन्द्र महतोलाई हिम्मत नहार्न शेष घलेको सुझाव, अरू कसले के भने ?

काठमाडौँ । गैरआवासीय नेपाली संघ (एनआरएनए) का पूर्व अध्यक्ष डा. शेष घलेले संघका संस्थापक अध्यक्ष डा. उपेन्द्र महतोलाई हिम्मत नहार्न सुझाव दिएका छन् । जेन–जी आन्दोलनको क्रममा आगजानी, तोडफोडको शिकार भएको महतोको घरको आज अवलोकनपछि घलेले यस्तो सुझाव दिएका हुन् । घलेले उक्त घटना दुःखद् भएको बताउँदै हिम्मत नहार्न हौसला प्रदान गरे । उनले संस्थागतरुपमै सबै मिलेर नेपालको आर्थिक विकासका लागि पनि एनआरएनए केन्द्रित हुनुपर्नेमा जोड दिएका छन् ।

संघका अध्यक्ष महेश कुमार श्रेष्ठको नेतृत्वमा टोलीले आज संस्थापक अध्यक्ष उपेन्द्र महतोसँग भेट गरेको हो । भदौ २३–२४ को जेन जी आन्दोलनका क्रममा घर ध्वस्त भएका महतोलाई बुधवार भेटेर अध्यक्ष श्रेष्ठले उक्त आक्रमण सम्पूर्ण एनआरएनमाथिको आक्रमण भएको बताए ।

एनआरएनबीचको एकता कमजोर हुँदा सबैतिरबाट आक्रमण भइरहेको भन्दै सबैलाई एकताबद्ध हुनका लागि अध्यक्ष श्रेष्ठले आग्रह पनि गरे । उनले भने ‘तपाईँको निवासमा गरिएको दुष्कृत्य केवल तपाईँ र तपाईँको परिवारमाथि प्रत्यक्ष आक्रमण मात्र थिएन, यो देशभित्र र विदेशमा रहेका प्रत्येक नेपालीको सम्मान, सुरक्षा र आशामाथि गरिएको हमला पनि हो ।’

आक्रमणले एनआरएन समुदायका हरेक सदस्यको मनमा गहिरो चोट पु¥याएको उल्लेख गर्दै अब बलियो एकताको सङ्कल्पका साथ अघि बढ्नु पर्नेमा अध्यक्ष श्रेष्ठले जोड दिए । नेपालमा सुरक्षा अवस्था कमजोर रहेको सन्देश गएको र यसले लगानी भित्र्याउन नकारात्मक असर पर्ने भन्दै यसका लागि सरकारले गम्भीर रूपमा समीक्षा गर्नु पर्नेमा उनले जोड दिए ।

यसैगरी एनआरएनए अभियन्ता आरके शर्माले एकताबद्ध एनआरएन बनाएर सबै अघि बढेमा आगामी दिनमा कसैले पनि एनआरएनहरू माथि हमला गर्न नसक्ने बताए। उनले हामी केही लिन नभएर केही दिनको लागि मातृभूमिको सेवामा जुटी रहेका छौँ भन्दै यो कुरा बुझी दिन सबै नेपालीलाई आग्रह पनि गरे।

त्यसैगरी, संस्थापक अध्यक्ष महतोले आफूले सधैँ नेपालको उन्नति होस् भनेर यतै लगानी गरेको बताउँदै यस्तो घटनाबाट पाठ सिकेर अघि बढ्नु पर्नेमा जोड दिए । उनले आफू व्यक्तिलाई भन्दा पनि एनआरएनलाई कमजोर पार्ने मानसिकताबाट उक्त आक्रमण गरिएको बताए । उनले आफ्नो घरमा क्षति गर्नेहरू जेनजी नभएको बताउँदै लुटेराहरूको पहिचान गरेर कारबाही गर्नु पर्नेमा जोड दिए । उनले भने, ‘यस पटक म माथि आक्रमण भयो, अर्को पटक अरू साथीहरूलाई नहोस्, म नै पहिलो र अन्तिम हुन चाहन्छु ।’

सो अवसरमा एनआरएनए उच्चस्तरीय समितिकी सदस्य सचिव जानकी गुरुङ, एनआरएन उपाध्यक्ष खगेन्द्र न्यौपाने, महिला संयोजक रश्मि थापा, युवा संयोजक भीमसेन थापा, अनुसन्धान संयोजक दीपेश खत्री, सदस्यसचिव धर्म राज गिरी, विपद् व्यवस्थापन समितिका सदस्य निरञ्जन भण्डारी, नीराजन खत्रीलगायतको उपस्थिति थियो ।