वासिङ्टन, २१ असोज । संयुक्त राष्ट्रसङ्घका महासचिव एन्टोनियो गुटेरेसले यमनमा हुथी विद्रोहीहरूले थप नौ जना संयुक्त राष्ट्रका कर्मचारीहरूलाई मनमानी रूपमा पक्राउ गरेको घटनाको कडा निन्दा गरेका छन् ।
उनले हुथी नियन्त्रणमा रहेका क्षेत्रहरूमा संयुक्त राष्ट्रसङ्घका सम्पत्ति र सुविधाहरू कब्जा गरिएको घटनाप्रति पनि गम्भीर चिन्ता व्यक्त गरे ।
राष्ट्रसङ्घका प्रवक्ता स्टेफन डुजारिकले जारी गरेको विज्ञप्तिमा भनिएको छ, “हालै हुथी डि–फ्याक्टो अधिकारीहरूले संयुक्त राष्ट्रसङ्घका नौ जना थप कर्मचारीलाई हिरासतमा लिएका छन्, जसका कारण सन् २०२१ देखि मनमानी रूपमा पक्राउ परेका संयुक्त राष्ट्रसङ्घका कर्मचारीहरूको कुल सङ्ख्या ५३ पुगेको छ ।”
विज्ञप्तिमा भनिएको छ, “यी कार्यहरूले यमनमा संयुक्त राष्ट्रसङ्घको मानवीय तथा विकास सहयोगका कार्यक्रम सञ्चालन गर्ने क्षमतामा गम्भीर असर पारिरहेका छन् ।”
गत महिना राष्ट्रसङ्घले हुथीहरूको नियन्त्रणमा रहेको राजधानी सानााबाट आफ्नो शीर्ष मानवीय संयोजकलाई सरकारको नियन्त्रणमा रहेको दक्षिणी सहर एडनमा स्थानान्तरण गरेको थियो ।
स्मरणीय छ, सन् २०१४ मा हुथी विद्रोहीहरूले सानाबाट अन्तर्राष्ट्रिय मान्यता प्राप्त सरकारलाई निष्कासन गरेपछि उक्त सरकारले एडन सहरलाई आफ्नो अस्थायी राजधानी बनाएको छ ।
यसअघि, गत अगस्टमा राष्ट्रसङ्घले इरान समर्थित हुथी विद्रोहीहरूले इजरायली आक्रमणमा विद्रोही प्रधानमन्त्रीको मृत्यु भएपछि प्रतिशोधस्वरूप कम्तीमा ११ जना राष्ट्रसङ्घीय कर्मचारीलाई पनि पक्राउ गरेको जनाएको थियो ।
डुजारिकले भने, “संयुक्त राष्ट्रसङ्घले मनमानी रूपमा हिरासतमा राखिएका सबै कर्मचारीहरूको तत्काल र सुरक्षित रिहाइका लागि, साथै कब्जा गरिएका सम्पत्ति र कार्यालयहरू फिर्ता गराउन उपलब्ध सबै माध्यमहरू प्रयोग गरी निरन्तर प्रयास जारी राख्नेछ ।”
उनले यस्ता कदमहरूले यमनमा अत्यावश्यक मानवीय सहायता वितरणमा थप अवरोध सिर्जना गरेको भन्दै तत्काल अन्तर्राष्ट्रिय नियम र मानवअधिकारको सम्मान गर्न हुथी पक्षलाई आग्रह गरे । रासस
प्रतिक्रिया