नयाँदिल्ली ३ पुस । अफगानिस्तानका जनस्वास्थ्य मन्त्री मावलवी नूर जलाल जलालीले भारत र अफगानिस्तानबीच परम्परागत चिकित्सा प्रणालीमा सहयोग बढाउन राज्यमन्त्री प्रतापराव जाधवसँग छलफल गरेको जनाइएको छ । छलफलमा उनीहरूले शिक्षा, अनुसन्धान, नियमन र स्वास्थ्य सेवा वितरणमा आपसी सहयोगका लागि नयाँ मार्गहरूको लागि पनि ध्यान केन्द्रित गरेको उल्लेख गरिएको छ ।
सामाजिक सञ्जाल एक्समा विवरण सार्वननिक गर्दै मन्त्रालयले परम्परागत औषधिमा दोस्रो डब्ल्यूएचओ ग्लोबल समिटको अतिरिक्त बैठक भएको बताएको छ ।
छलफल आयुर्वेद, युनानी र होम्योपेथी लगायत परम्परागत चिकित्सा प्रणालीहरूमा सहकार्य बढाउन केन्द्रित रहेको बताइएको छ ।
मन्त्रालयले यस अन्तरक्रियाले समग्र र जन–केन्द्रित स्वास्थ्य सेवाको महत्वपूर्ण स्तम्भको रूपमा परम्परागत औषधि प्रवद्र्धन गर्न भारत र अफगानिस्तानको साझा प्रतिबद्धतालाई पुनः पुष्टि गरेको छ ।
यस अघि, केन्द्रीय स्वास्थ्य मन्त्री जे. पी. नड्डाले बुधबार अफगानिस्तानका मन्त्री जलालीसँग फलदायी बैठक गरी मानवीय र स्वास्थ्य सेवामा ध्यान केन्द्रित गरेको बताइएको छ ।
भेटका क्रममा भारतले द्विपक्षीय संलग्नताको प्रमुख स्तम्भका रूपमा औषधि र स्वास्थ्य सहायताको दीर्घकालीन आपूर्तिमा जोड दिँदै अफगानिस्तानका लागि मानवीय सहयोग जारी राख्ने आफ्नो प्रतिबद्धता जनाएको छ ।
सहयोगको एक भागको रूपमा, क्यान्सर औषधि र खोपहरूको प्रतीकात्मक हस्तान्तरण गरिएको थियो ।
जस अन्तर्गत देशमा स्वास्थ्य सेवाहरूलाई सुदृढ पार्न सीटी स्क्यानरसहित औषधि र खोपहरूको ठूलो मात्रा पनि अफगानिस्तान पठाइएको जनाइएको छ ।
स्वास्थ्य–केन्द्रित छलफलका लागि कूटनीतिक पृष्ठ भूमि प्रदान गर्दै एक दिन अघि देशको पहिलो आधिकारिक भ्रमणमा अफगान जनस्वास्थ्य मन्त्री मावलवी नूर जलाल जलालीलाई भारतको विदेश मन्त्रालयले स्वागत गरेपछि यो सहकार्य भएको हो ।
भ्रमणले अफगानिस्तानको स्वास्थ्य सेवा प्रणालीका लागि भारतको स्थायी समर्थन मानवीय पहुँचमा निरन्तरतालाई उजागर गरेको छ । रासस
प्रतिक्रिया