जापानको कारखानामा हिंसात्मक घटना : १४ जना घाइते

टोकियो, ११ पुस । जापानको मध्य भागमा पर्ने शिजुओका प्रान्तको मिशिमा सहरस्थित एक कारखानामा भएको चक्कु प्रहारमा १४ जना घाइते भएका छन् ।

मिशिमाको अग्नि नियन्त्रण विभागका अधिकारी टोमोहारु सुगियामाका अनुसार घाइतेहरूलाई आपतकालीन सेवामार्फत अस्पताल लगिएको छ । उनका अनुसार शुक्रबार दिउँसो करिब साढे चार बजे नजिकैको रबर कारखानाबाट फोन आएपछि उद्धार टोली घटनास्थल पुगेको थियो ।

फोनमा पाँच वा छ जनालाई कसैले चक्कु प्रहार गरेको जानकारी दिइएको थियो । जापानी सञ्चारमाध्यमका अनुसार घटनासँग सम्बन्धित एक व्यक्ति प्रहरी नियन्त्रणमा लिइसकिएको छ । रासस