कैदीबन्दीको चाप बढेपछि ८१ जनालाई स्थानान्तरण

चितवन, ८ माघ । कारागार कार्यालय चितवनमा कैदीबन्दीको चाप बढेपछि ८१ जनालाई विभिन्न कारागारमा स्थानान्तरण गरिएको छ । कारागार कार्यालयले साउनदेखि हालसम्म देशका विभिन्न कारागारमा उनीहरूलाई स्थानान्तरण गरेको हो ।

मकवानपुरको भिमफेदी, कपिलवस्तु, नुवाकोट, जगन्नाथदेवल काठमाडौँ, कास्की, नवलपरासी र नख्खुमा उनीहरूलाई स्थानान्तरण गरिएको हो । कारागारमा रहेका कैदीलाई चापअनुसार स्थानान्तरण गरिँदै आइएको कार्यालयका सूचना अधिकारी चेतनाथ ढुङ्गानाले जानकारी दिए। उनका अनुसार साउनयता उनीहरूलाई स्थानान्तरण गरिएको हो ।

अहिले कारागारमा ३९ जना महिलासहित ६३२ जना कैदीबन्दी छन् । उनीहरूसँग आश्रित दुई जना बालबालिका पनि रहेका सूचना अधिकारी ढुङ्गानाले बताए । उनका अनुसार कारागारको क्षमता ५०५ जनाको हो । “महिला ३० र ४७५ जना पुरुषको क्षमता रहेको छ । यस कारागारमा विभिन्न जिल्लाबाट उपचारका लागि आउने कैदीबन्दी र चितवन, नवलपरासी ९बर्दघाट–सुस्ता पूर्व०मा कारागार नहुँदा त्यहाँका कैदीबन्दी पनि ल्याउने गरिन्छ”, उनले भने ।

यहाँबाट गत भदौ २५ गते ७३९ जना कैदीबन्दी भागेका थिए । जसमध्ये अहिलेसम्म ११४ जना कैदीबन्दी फर्कन बाँकी रहेका छन् । जसमध्ये ११ जना भारतीय नागरिक हुन् । रासस