जाकार्ता, इन्डोनेसियाकाे,११ माघ। इन्डोनेसियाकाे वेस्ट जाभा प्रान्तमा शनिबार आएको भूस्खलनमा मृत्यु हुनेहरूको संख्या १६ पुगेको छ। पश्चिम जाभा प्रहरी प्रवक्ताले जानकारी दिएका अनुसार, मृतकमध्ये सातजनाको पहिचान भइसकेको छ भने बाँकी शवहरूको पहिचान डीएनए परीक्षण मार्फत भइरहेको छ।
भूस्खलन स्थल वेस्ट ब्यान्डुङ जिल्लाको चिसारुआ क्षेत्र रहेको बताइएको छ। पहिचान नभएका शवहरूलाई अस्थायी रूपमा स्थानीय अस्पतालमा राखिएको छ।
इन्डोनेसियाको राष्ट्रिय खोज तथा उद्धार एजेन्सीले उद्धार कार्यमा करिब २५० प्रशिक्षित कर्मचारी तैनाथ गरेको छ। उद्धार कार्यमा ड्रोन, खोजी कुकुर र सीमित भारी उपकरण प्रयोग भइरहेको छ, तर जोखिमपूर्ण भू-भाग र अस्थिर स्थलको कारण उद्धार कार्य चुनौतीपूर्ण रहेको एजेन्सीले जनाएको छ।
एजेन्सीले अझै अनुमानित ८० जना मानिसहरू भू-भाग मुनि फसेको आशंका गरिएको बताएको छ। उद्धार टोलीले दुर्घटनास्थलमा सबैभन्दा प्रभावकारी तरिकाले खोजी र उद्धार कार्य सञ्चालन गर्ने प्रयास गरिरहेको छ।
प्रहरी र उद्धार टोलीले स्थानीय बासिन्दाहरूलाई सतर्क रहन र प्रभावित क्षेत्रबाट जोगिन निर्देशन दिएका छन्। घटनाको कारण अध्ययन गर्न र भविष्यमा यस्ता प्राकृतिक विपत्तिबाट सुरक्षा सुनिश्चित गर्न सरकारले प्रारम्भिक अनुसन्धान सुरु गरेको छ। रासस
प्रतिक्रिया