कांग्रेस जिताउन गगनले मागे देउवासँग सहयोग

काठमाडौं, माघ १३ । नेपाली कांग्रेसले परिपत्र गर्दै फागुन २१ गते हुने निर्वाचनमा एक ढिक्का भएर लाग्न आग्रह गरेको छ । नेपाली कांग्रेस जिल्ला कार्यसमिति र सबै जिल्ला कार्यसमितिका सभापतिलाई परिपत्र गर्दै निर्वाचन कार्यक्रममा सहभागी हुन कांग्रेसको आग्रह छ ।

एकताबद्ध भएर कांग्रेसलाई जिताउन आग्रह गरिएको पत्रमा कांग्रेस नवीन उर्जा र एकतासहित रुपान्तरणको दिशामा अगाडि बढेको उल्लेख छ । पत्रमा शेरबहादुर देउवालाई पनि नाम नै उल्लेख गरेर सम्बोधन गर्दै सहयोगका लागि आग्रह गरिएको छ । “नेपाली कांग्रेसलाई आगडि बढाउन पार्टीका निवर्तमान सभापति शेरबहादुर देउवालगायत पार्टीमा विभिन्न तह र निकायमा रहनु भएका साथीहरूबाट पार्टीको यो लोकतान्त्रिक प्रक्रियालाई सहज रुपमा लिई पूर्ण साथ रहनेछ भन्ने पार्टीले विश्वास लिएको छ,” पत्रमा उल्लेख छ ।

नेपाली कांग्रेस नवीन अध्यायमा प्रवेश गरेको भन्दै विभिन्न समूहमा रहेकालाई पार्टीमा फर्किन आग्रह गरिएको छ । यसअघि विभिन्न कारणबाट अलग भएका, विभिन्न राजनीतिक समूहमा क्रियाशील रहेका, निष्क्रिय रहेका र अन्यायको महसुस गरेकालाई आफ्नो आगनमा फर्किन अनुरोध गरिएको छ ।

नेपाली कांग्रेसका उमेदवारलाई विजयी गराउन पार्टीका सबै तहलाई परिचालन गर्न पत्रमार्फत आग्रह गरिएको छ ।