न्युजिल्यान्डमा बाढीका कारण एक जनाको मृत्यु , हजारौं बिजुली बिहिन

वेलिङ्टन(न्युजल्याड), ५ फागुन। पछिल्लो समयमा भारी वर्षा र तीव्र हावाको साथ न्युजिल्यान्डमा आएको बाढीका कारण एक जनाको मृत्यु हुनुका साथै धेरै समुदायहरू बिजुली बिहिन भएको अधिकारीहरूले बताएका छन् ।

गत शुक्रबार देखि आएको गम्भीर आँधीले उत्तरी टापुमा आपतकालिन अवस्था निम्त्याएको जनाउदैँ वाइकाटो क्षेत्रीय परिषद्ले एक सय वर्षको अवधिमा वर्षाले असामान्य बाढी र आँधी ल्याएको जनाएको छ ।

उत्तर टापुको ओटोरोहाङ्गा नजिकै आएको बाढीमा एउटा कार फसेर एक व्यक्तिको मृत्यु भएको प्रहरीले जनाएको छ ।मङ्गलबार साउथ आइल्यान्डको क्राइस्टचर्चतर्फ अघि बढ्नु अघि सोमबार राजधानी वेलिङ्गटनमा पुगेको आँधीले देशभर त्रास जारी राखेको जनाइएको छ ।

ऊर्जा अपरेटर पावरकोले मङ्गलबार तल्लो नर्थ आइल्यान्डमा करिब १० हजार घर-परिवार बिजुली विहीन भएको बताउनु भएको छ, भने अर्को बिजुली कम्पनी ओरियनले क्राइस्टचर्च बाहिर ब्याङ्क प्रायद्वीपमा २०० भन्दा बढी घरपरिवार बिजुलीविहीन भएको जनाएको छ ।

वेलिंग्टन नजिकै, वैरारापा टाउनसिप लेक फेरी सहरमा पुग्ने सडक बाढीले बगाए पछि आवत जावत बन्द भएको जनाएको छ ।

क्राइस्टचर्च बाहिरको अकारोआ सहर पनि मङ्गलबार बाढीको कारण क्षेतिग्रस्त भएको न्युजिल्यान्ड यातायात विभागले जनाएको छ । राष्ट्रिय मौसम विज्ञान विभाग मेटसर्विसले सोमबार वेलिङ्गटनमा आएको हावा सन् २०१३ पछिको सबै भन्दा शक्तिशाली हावा भएको बताएको छ ।

सहरमा आएको हावाको गती १९३ किलोमिटर प्रति घण्टाको रेकर्ड गरिएको मेटसर्विसले जनाएको छ । रासस