फ्रान्सले युरोपलाई जोगाउन आणविक हतियार बढाउने

इले लङगु, फ्रान्स, १९ फागुन  । राष्ट्रपति इम्यानुएल म्याक्रोँले सोमबार फ्रान्सले आफ्ना परमाणु हतियारहरूको सङ्ख्या बढाउने र महाद्वीपको रक्षाका लागि आठ देशहरूसँग सहकार्य गर्ने बताएका छन् ।

युक्रेनविरुद्ध रूसको युद्ध पाँचौं वर्षमा प्रवेश गरेको छ । नेटो सहयोगीहरू वाशिङ्गटनको डगमगाउने प्रतिबद्धताको बारेमा चिन्तित छन्। यसैबीच, आवश्यकताको सिद्धान्तमा जोड दिँदै फ्रान्सको इले लङ्गु आणविक पनडुब्बी शिविरबाट गरेको सम्बोधनमा म्याक्रोँले देशको परमाणु सिद्धान्तलाई अद्यावधिक गरे ।

मध्यपूर्वलाई अस्थिर बनाउने खतरा रहेको इरानविरुद्ध अमेरिका र इजरायलले आक्रमण गरेपछि उनले यस्तो बताएका हुन् ।

म्याक्रोँले भने, “हामीले धेरै खतराहरूको सामना गर्दै हाम्रो आणविक प्रतिरोधलाई बलियो बनाउनुपर्छ र हामीले हाम्रो सार्वभौमिकताको पूर्ण सम्मानका साथ युरोपेली महाद्वीपभित्र हाम्रो प्रतिरोधक रणनीतिलाई विचार गर्नुपर्छ।”

उनले घोषणा गरे, “म उन्नत प्रतिरोधको क्रमिक कार्यान्वयन गर्छु।”

“हाम्रो शस्त्रागारको स्तरोन्नति गरिनु आवश्यक छ”, उनले थपे, “त्यसैले मैले हाम्रो शस्त्रागारमा परमाणु हतियारको संख्या बढाउन आदेश दिएको छु।”

फ्रान्ससँग विश्वको चौथो ठूलो आणविक हतियार छ, जसमा लगभग २९० ‘वारहेड’ रहेको अनुमान गरिएको छ। फ्रान्सले प्रस्ताव गरेको ‘अत्याधुनिक’ आणविक प्रतिरोध योजनामा जर्मनी, बेलायत र पोल्यान्डसहित आठ युरोपेली देश सहभागी हुन सहमत भएको म्याक्रोँले बताए ।

“नेदरल्यान्ड्स, बेल्जियम, ग्रीस, स्वीडेन र डेनमार्क पनि समावेश भएका देशहरूले फ्रान्सेली ‘रणनीतिक वायु सेना’ को लागि सहयोग गर्न तयार हुनेछन्, जसले ‘हाम्रा प्रतिद्वन्द्वीहरूको गणनालाई जटिल बनाउन’ र ‘युरोपेली महाद्वीपमा विस्तार’ सम्भव हुनेछ,” उनले भने ।

म्याक्रोँले भने, “यो योजनाले हाम्रो आणविक गतिविधिमा मित्र राष्ट्रहरूको परम्परागत सहभागितालाई पनि समावेश गर्न सक्छ, जस्तै हालैको सैन्य अभ्यासमा बेलायती सेना संलग्न थियो।”

इले लङ्गु शिविरमा फ्रान्सका चार पनडुब्बी ब्यालेस्टिक मिसाइल ‘ट्रिओम्फन्ट, ले टेमेरेरे, ले भिजिलान्ट र ले टेरिबल’ छन् ।
आणविक प्रतिरोध सुनिश्चित गर्न कम्तिमा एउटा समुद्र बाहिर छ । रासस