यस्तो छ रास्वपाको सांसद अभिमुखीकरण कार्यक्रमको तालिका

काठमाडौं, चैत ३ । राष्ट्रिय स्वतन्त्र पार्टी (रास्वपा)ले आफ्ना नवनिर्वाचित सांसदहरूलाई आज र भोली संसदीय अभ्यास र जिम्मेवारीबारे दुई दिने अभिमुखीकरण प्रशिक्षण दिन लागेको छ । ललितपुरको ग्वार्कोस्थित होटल रोयल टुलिपमा आयोजना हुने अभिमुखीकरण कार्यक्रमको सार्वजनिक तालिका अनुसार कार्यक्रममा सांसदहरूलाई संसदीय प्रक्रिया, कानुन निर्माण, नीति विश्लेषण, सुशासन, पारदर्शिता र जनप्रतिनिधिको भूमिकाबारे विस्तृत जानकारी प्रदान गरिने जनाइएको छ ।

नवनिर्वाचित सांसदहरूलाई संसदीय प्रक्रिया, कानुन निर्माण, नीति विश्लेषण र जनप्रतिनिधिको भूमिकाबारे स्पष्ट बुझाइ प्रदान गर्न, सांसदहरूलाई प्रभावकारी, उत्तरदायी र परिणाममुखी प्रतिनिधि बन्न सहयोग गर्न, पार्टीको रणनीति, दृष्टिकोण र नीतिगत प्राथमिकता स्पष्ट गराउन र संसद, सरकार र निर्वाचन क्षेत्रबीच प्रभावकारी समन्वय कायम गर्न सक्षम बनाउन अभिमुखीकरणको आयोजना गरिएको रास्वपाले जनाएको छ ।

सार्वजनिक कार्यक्रम अनुसार आज पहिलो दिन संसदीय अभ्यास र अनुभव आदानप्रदान हुँदैछ । आज अभिमुखीकरण कार्यक्रमको उद्घाटन लगत्तै डा. अरनिको भण्डरीले कार्यक्रमको उदेश्य र महत्वबारे प्रकाश पार्नेछन् । त्यसपछि पार्टीका उपसभापति डा स्वर्णिम वाग्लेले किनोट मन्तव्य राख्नुका साथै देशको वर्तमान अवस्था र सांसदको भूमिकाबारे प्रस्तुति दिनेछन्। अर्का उपसभापति डोल प्रसाद अर्यालले चुनावी अभियानको अनुभव साट्नेछन्।

पहिलो दिनको सत्रमा पूर्वसचिव सुरेश अधिकारीले संसद्को संरचना र कार्यप्रणाली तथा पूर्व कानुन सचिव तोयानाथ अधिकारीले कानुन निर्माण प्रक्रियामा सांसदको भूमिकाबारे प्रशिक्षण दिनेछन्। यसैगरी, अध्येता डा दोभान राईले लोकतन्त्र र सुशासनमा कृत्रिम बुद्धिमत्ताको प्रभावबारे प्रस्तुति दिनेछिन्। पार्टीका पुराना सांसदहरू अशोक चौधरी, शिशिर खनाल, डा। तोसिमा कार्की, सोबिता गौतम, गणेश पराजुली लगायतले आफ्नो संसदीय अनुभव नवनिर्वाचित सांसदहरूलाई सुनाउनेछन्।

दोस्रो दिन अर्थात भोली चैत्र ४ गतेको कार्यक्रम बिहान योग तथा ध्यानबाट सुरु हुनेछ। दोस्रो दिन विशेषगरी बजेट र सुशासनमा केन्द्रित रहनेछ। पूर्वसचिव डा तोयानारायण ज्ञवालीले योजना तथा बजेट निर्माण प्रक्रिया र पूर्वसचिव प्रताप कुमार पाठकले सुशासनबारे सांसदहरूलाई प्रशिक्षित गर्नेछन्। त्यसैगरी, महामन्त्री कविन्द्र बुर्लाकोटी लगायतले नयाँ राजनीतिक संस्कारमा सांसदको आचारसंहिता र पार्टीसँगको सम्बन्धबारे प्रष्ट पार्नेछन्।