इरानद्वारा २१ वटाभन्दा बढी सैन्य लक्ष्यमा निशाना

काठमाडौँ । इरान र संयुक्त राज्य अमेरिकाबिचको सैन्य तनाव एकाएक चुलिएर गएको छ ।

स्ट्रेट अफ होर्मुजमा रहेका आफ्ना बन्दरगाह र टापुहरूमा अमेरिकी सेनाले गरेको आक्रमणको बदलास्वरूप इरानको इस्लामिक रिभोलुसनरी गार्ड कर्प्स (आईआरजीसी) ले बहराइन, कुवेत र जोर्डनमा रहेका अमेरिकी सैन्य आधार शिविरहरूमा जवाफी हमला गरेको हो ।

इरानको राज्य नियन्त्रित सञ्चारमाध्यमले बुधबार सार्वजनिक गरेको आईआरजीसीको विज्ञप्तिअनुसार इरानी सेनाले बहराइनमा तैनाथ अमेरिकी पाँचौँ नौसैनिक फ्लिटका साथै कुवेतको अली अल सालेम सैन्य बेसमा ड्रोन आक्रमण गरेको हो । यसका साथै जोर्डनको अजराकमा रहेको वायुसेनाको अखडालाई लक्षित गरी लामो दुरीको मिसाइल प्रहार गरिएको इरानले जनाएको छ ।

आफ्नो कारबाहीका क्रममा २१ वटा अमेरिकी सैन्य लक्ष्यहरूलाई निशाना बनाएको र त्यसमध्ये चारवटालाई पूर्ण रूपमा ध्वस्त पारेको इरानको दाबी छ । ध्वस्त पारिएका संरचनाहरूमा जोर्डनको सैन्य बेसमा रहेको अमेरिकी आधुनिक ‘एफ–३५’ लडाकु विमानको ह्याङ्गर समेत समावेश रहेको इरानले उल्लेख गरेको छ । यसैगरी, इरानी सहर जामको आकाशमा उडिरहेको अमेरिकाको अत्याधुनिक ‘एमक्यू–९’ ड्रोनलाई समेत आफूहरूले सफलतापूर्वक खसालेको आईआरजीसीले दाबी गरेको छ ।

यो भर्खरैको सैन्य टकराव मंगलबार अमेरिकी अपाचे हेलिकप्टर खसालिएको घटनाबाट सुरु भएको हो । सो घटनामा इरानको हात रहेको आरोप लगाउँदै अमेरिकी सेनाले स्ट्रेट अफ होर्मुज क्षेत्रमा पर्ने इरानको क्युशम टापु र तटीय क्षेत्रका बन्दरगाहहरूमा आक्रमण गरेको थियो । अमेरिकी सेनाको सोही आक्रमणको प्रतिक्रियास्वरूप इरानले यो ठुलो कदम चालेको हो । अमेरिकी हमलाका कारण इरानको सिरिक सहरमा रहेको एउटा दूरसञ्चार टावरमा क्षति पुगेको र दुईवटा पानीका ट्याङ्की ध्वस्त भएको इरानी पक्षले बताएको छ ।

आईआरजीसीले आफ्ना सैन्य दस्ताहरू अमेरिकी सेनाको जुनसुकै कदमको ‘निर्णायक’ जवाफ दिन पूर्ण रूपमा तयार अवस्थामा रहेको चेतावनी दिएको छ । आगामी दिनमा परिस्थिति अझ बिग्रिएमा र तनाव बढेमा त्यसको सम्पूर्ण जिम्मेवारी वासिङ्टनले लिनुपर्ने इरानको भनाइ छ । यस विषयमा अमेरिकाको तर्फबाट भने अहिलेसम्म आधिकारिक रूपमा कुनै प्रतिक्रिया आइसकेको छैन ।

यसैबिच, जोर्डनको सेनाले इरानको तर्फबाट अजराकतर्फ प्रहार गरिएका पाँचवटा मिसाइलहरूलाई आकाशमै सफलतापूर्वक विफल पारिदिएको दाबी गरेको छ । जोर्डन सैन्य स्रोतका अनुसार यस सैन्य कारबाहीका क्रममा क्षेप्यास्त्रका टुक्राहरू आकाशबाट खसे पनि मानवीय क्षति वा कुनै भौतिक नोक्सानी भने भएको छैन ।

इरानको यो आक्रमणसँगै बहराइन र कुवेतमा रहेका अमेरिकी सैन्य इलाकाहरूमा हवाई आक्रमणको चेतावनी दिने साइरनहरू बजेका थिए । कुवेतको सेनाले आफ्नो आकाशमा देखिएका ‘हवाई लक्ष्यहरू’ लाई निस्तेज पार्ने काम भइरहेको बताए पनि यसबारे थप विवरण सार्वजनिक गरेको छैन ।

यस विषयमा अमेरिकास्थित क्विन्सी इन्स्टिच्युट फर रेस्पोन्सिबल स्टेटक्राफ्टका कार्यकारी उपाध्यक्ष त्रिता पार्सीले अल जजिरासँग कुरा गर्दै इरानले अमेरिकी आक्रमणको बदला निकै कडा र तीव्र गतिमा दिन खोजेको विश्लेषण गरेका छन् । पार्सीले भने, ‘यदि इरानले यसरी तुरुन्तै जवाफ नदिएको भए अमेरिकाले इरानमाथि जतिबेला पनि सजिलै आक्रमण गर्न सक्छ भन्ने भाष्य स्थापित हुने थियो ।’ एजेन्सी